Kan Enero 20, ipinaisi sa publiko na an Scholarship Program nagpuon nang mag-ako nin aplikasyon sa mga mawot magin iskolar kan Foundation. An anunsyo ginibo sa paagi kan Casarig, programa sa radyo kan Foundation sa DWRV 98.3 FM The Mother’s Touch.

“Mas amay, mas maray. Mas priority ta itong mga maiinot na makakapasa asin kwalipikado,” segun ki April Joy Noleal an Training and Formation Coordinator.

Siring kan dati, an prayoridad na mga kurso iyo an Bachelor of Science in Entrepreneurship asin AB Religious and Values Education sa Ateneo de Naga University (ADNU) asin an 4-year Agriculture-related courses sa Central Bicol State University of Agriculture –Pili (CBSUA).

Halawig an proseso kan pagpili kan mga bagong iskolar nin huli ta sampulo sana man an kukuanon na bagong iskolar sa ADNU asin 10 man an sa CBSUA. Lain pa sa mga dokumentong dapat ipasa, may mga interbyu man na gigibuhon. Maako an Foundation nin mga dokumento hasta Abril 30.

Sa mga mawot na magin iskolar, pwede magbisita sa samuyang opisina sa laog kan ADNU-Main Campus o magkontak sa 0985 767 1403 asin hanapon si Noleal.