Pinagmidbid an pitong (7ng) mga empleyado kan Foundation huli sa saindang dedikasyon asin lawig kan saindang serbisyo sa Foundation.

Ginibo an Lingkod Parangal sa tahaw kan Christmas Celebration na binalihan kan gabos na mga empleyado kan Consuelo “Chito” Madrigal Foundaion – Bikol (CCMF-Bikol). An aktibidad ginibo sa Xavier Hall, Ateneo de Naga University Main Campus. Apwera sa mga empleyado presente man an mga nagkapirang bisita.

An mga empleyadong pinagmidbid iyo sinda Fr. Wilmer Joseph Tria, Chief Executive Officer (20 years); Roy Austria (15 years); Marc Emil Gonowon (5 years); Jake Proa (5 years); Jonald Salinas (5 years); Jerry Gutierrez (5 years); Dominador Dollisen (5 years).

Sa mensahe ni Fr. Tria, nag-istorya sya kun papano sya nagpuon na maglingkod sa Foundation. Kan 2004, sya an pinili kan dating Arsobispo kan Caceres na si Leonardo Z. Legaspi, OP. na magmangno kan Foundation, kaiba si Fr. Joel E. Tabora, SJ, an dating presidente kan Ateneo de Naga University.

Kan si Doña Consuelo “Chito” Madrigal nakumbinsir ni Fr. Tabora na magheras kan saiyang yaman sa Bikol, nagmawot si Madrigal na makatabang man sa Dominikanong padi. Ini nin huli ta an saiyang ama, si Don Vicente, dating iskolar kan mga Dominikano sa Letran. Si Legaspi sarong Dominikano kun kaya marikas na nagtugot si Madrigal na magmukna kan CCMF-Bikol.

Sabi ni Tria, kan pagpuon nya sa Foundation, iyo man an enot na pagkakataon na madangog nya an tataramon na “Microfinance.”

Nagheras man si Roy Austria an Area 4 Manager kan Microfinance program kan saiyang mga nagunong adal sa laog nin 15ng taon na pagserbi, “Sa tabang kan Madrigal Foundation, lalo na an mga pa training nagbago an sakong perspective sa buhay lalo na pag-abot sa trabaho. Mas nahasa an sakong leadership [skills] lalo na kaipuhan kan sakong trabaho. Naoogma akong magserbi lalo na sa mga nanay na marhay man an pakikisama sako. Lalo na kung nagkakaugwang pagkakataon na nagkakahirilingan ulit, arog kan assembly kada December.”

Mensahe ni Austria sa saiyang mga kaibahan na empleyado sa Foundation iyo an, “Magin maogma lang sinda sa saindang ginigibo asin i-treasure ninda an mga nangyayari sainda sa kada aldaw lalo na sa center meeting. Isipon lang ninda na dakul an makukua nindang adal bako lang sa trabaho pati din sa panuraaldaw na buhay.”