“Urog na maparani sa Simbahan, mapararom pa an pagtubod kan mga kaakian asin makisumaro bilang sarong bilog na komunidad na nagbabaklay pasiring ki Jesu Cristo,” ini an mga katuyuhan kun kaya nagkakaigwa kada taon nin National Youth Day (NYD). Hobenes hali sa manlain-lain na Dyosesis sa bilog na Pilipinas an nagtitiripon sa laog nin duwa hasta tulong aldaw.

Sa Hunyo 10 hasta 14, gigibuhon an National Youth Day sa Arkidyosesis kan Caceres. Linalauman an rinibong hobenes an mapasiring sa Syudad nin Naga para magbali sa dakulang okasyon na ini. Kan 2021 pa dapat nagkaigwang NYD sa Caceres. Dai ini nadagos nin huli sa pandemyang COVID-19.

Magkapirang parokya kan Caceres an imbwelto sa pag-andam kan okasyon asin sa pagsiguro na may pamilyang dadagusan kan mga hobenes.

Kan Marso 1, sa pakikisumaro sa Simbahan asin komunidad, an mga iskolar kan Madrigal Foundation nag-atendir kan Congress of the Youth na ginibo sa Holy Rosary Minor Seminary. An aktibidad katakod kan pag-andam para sa NYD. An mga iskolar magigin katuwang kan duwang parokya – an San Rafael Archangel Parish sa Pili asin St. Anne Parish sa Magarao, Camarines Sur. Para sa Foundation, an saindang pagbali bilang volunteers, makakatabang sa saindang pagtalubo sa Katolikong pagtubod.