Scholars’ Lenten Recollection: Pangapudan sa Tamang Pagpili

 Kan Abril 5, ginibo an lenten recollection kan mga iskolar kan Foundation hali sa Ateneo de Naga University (ADNU) asin sa Central Bicol State University for Agriculture – Pili Campus (CBSUA-Pili).

Si Fr. Wilmer Joseph S. Tria, an Chief Executive Officer, an nagin tagapagtaram sa ginibong aktibidad na naghatod nin mga pagirumdom sa mga iskolar, sa pag-andam para sa Midterm Elections 2025 ngunyan na Mayo. 

“To be good and responsible citizens, we should cultivate our hearts,” pahayag ni Fr. Tria.

Segun ki Alijah Serrano, saro sa mga iskolar na nagkaklaseng Entrepreneurship sa ADNU, an recollection nagpagirumdom sa mga iskolar na makiaram sa pulitika asin papusugon an integridad. “It is a reminder for us to keep our intentions good, tell words with integrity, and make sure that our actions match them. Maghurop-hurop kita sa mga pipilion asin dai magpadara sa kun ano an itinatao lang satuya (kan mga pulitiko). Mag-focus kita sa kun ano an kaya ninda gibuhon para sa ikararahay kan gabos asin panghaluyan,” pahayag pa ni Serrano.

Sa paliwanag ni Fr. Tria, sinabi man nya an makangirhat na sitwasyon kan edukasyon sa nasyon. Nin huli ta an mga kaakian edad 0- 4 na taon, dai natawan nin tamang nutrisyon, kulang an saindang kakayahan na magsabot asin makanuod. Kun kaya, an kagutuman (hunger) na dara kan pagtios (poverty), dapat masimbagan para mas magin andam an mga aki na mag-adal. 

Kun kaya, sabi ni Fr. Tria, agyat sa gabos na botante na magpili nin mga lideres na may puso sa mga kasaraditan asin may pagmakulog sa nasyon asin lambang namamanwaan. “An political dynasty an saro sa mga rason kun kaya dai kita nakakahawas sa pagtios,” dagdag pa nya.

Segun ki Hazel Prieto, iskolar na nagkaklase sa kursong Bachelor of Science in Agriculture sa CBSUA, “All of us need to rediscover the importance of the heart, na dapat may puso ka sa society para aligned an actions mo sa tama. Dapat magin matalino sa pagboto. Magin involved sa mga programs sa pagpalakop kan tama asin totoong information.

Nagkaigwa man pagpakumpisal asin Banal na Santa Misa na pinanginutan ni Fr. Fidel Mamerto Bagayaua. Sabi ni Fr. Bagayaua, dapat pilion kan mga iskolar an lider na “May pandangog, nagdadangog asin maray an dangog.”

More stories