An “No Plastic Policy” saro sa polisiya kan Ateneo de Naga University tabang sa pagpababa kan basura sa Syudad kan Naga.

Sa datos kan Syudad, kan 2024, 33.70 porsyento o 39.72 na tonelada nin basura an idinugang sa nakolektang basura kumpara kan 2023. Dakulang porsyento kaini an mga single-use plastic materials arog kan plastic utensils, plastic cups, plastic bags. Kun kaya, nagkaigwang desisyon na ibawal an paggamit nin plastic asin ribayan ini nin karton o papel.

An Coko Café, saro sa mga kakanan sa laog kan unibersidad, suportado an pagpautob kaini. Haloy nang karton an takeout boxes sa Coko Café. Alagad, ngunyan, an paggamit nin plastic bag riribayan na nin dakulang paper bag o eco bag.

Segun ki Teresa Immaculada Paylado, an Restaurant Manager, “Pwede man magdara na lang sinda (customers) nin mga laagan, tumbler or balunan. Okay man yan samo, although madadagdagan nin gibo pero mas okay yan samuya.”

Si Emavel Almonicar, saro sa mga kliyente, nagpaabot man kan saiyang pagsuporta. “Okay man lang ang pag-implement ng paper. Ang problema lang nun, pag may mga sabaw ang take out mo tapos malayo (ang pupuntahan).”

Segun ki Mary Grace Binlayo, Assistant Manager, sinisigurado kan Coko Café na dai maapektuhan an kalidad kan saindang produkto asin serbisyo.