Pag-uswag kan Negosyo asin Proteksyon kan Pamilya: Paglaom hatod kan Microfinance

Kan 2022, nagin myembro si Marilyn Tejares kan microfinance program. An saiyang enot na loan na may kantidad na Limang Ribo, ginamit nya sa negosyong piggery. “Dati duwa-duwang urig lang an nababakal mi, ngunyan 3 na an urig ming fattening,” an sabi ni Marilyn.

Alagad, bako sanang dugang na kapital an nakua ni Marilyn; naengganyo sya na magbali sa programa huli sa insurance, scholarship, asin housing program. An saiyang aki na si Adelyn, saro sa mga iskolar kan Foundation na nagkaklase sa Ateneo de Naga University. Ngunyan,  3rd year na si Adelyn sa kursong Bachelor of Arts in Religious and Values Education. Dakulang tabang man sa mga myembro na inoobligang magsaray nin savings. “Pag mayong allowance duman po kami nakakakua sa savings ni Mama,” segun ki Adelyn.

Kan nagadan an agom ni Marilyn na si Rolando kan Enero ngunyan na taon, nakaresibe an pamilya nin tabang pinansyal hali sa life insurance asin burial assistance.  “Importantehon ta bako lang loan sa Microfinance an nakukua ming benepisyo. Bako lang ako an insured pati na ang sakuyang pamilya,” pahayag ni Marilyn.

Segun man ki Adelyn na iyo an naglakaw kan claims asin mga requirements na kinaipuhan, “Madalion lang po an process. Tapos dikit lang an requirements na pighahagad.”

Pagirumdom ni Marilyn, “Importanteng magin responsableng myembro sa paghuhulog kada semana para sa padagos na pag-uswag kan negosyo asin siguradong proteksyon.”

Dagdag pa niya “Dakulaon an tabang sa satuya kan Microfinance bako lang na natutukduan kita na magkasararo kundi pati na an tamang paggamit kan kwarta.”

An Consuelo “Chito” Madrigal Microfinance igot na nag-aalok sa mga saradit na negosyante na magbali sa programa asin magin aktibo sa center. An dagdag kapital, savings asin insurance, maasahan kan lambang myembro mantang sinda naghihingua para sa saindang pamilya.

An interes na binabayad kan mga myembro, nakakatabang bako lang para maghiwas an programa kundi pati na an Scholarship Program para magdakul an mga hobenes na natatabangan makapag-adal.

More stories