Edukasyon asin Agrikultura: Kusog kan Banwaan 

An istorya ni Rose Hannah Añes, sarong patunay  na an edukasyon saro sa mga susi sa pag-uswag kan buhay asin negosyo. Sya nagkukua kan kursong Agribusiness sa Central Bicol State University of Agriculture – Pili Campus asin iskolar kan Foundation. 

Katakod kan saiyang pagigin iskolar, kabali man sya sa Apprenticeship Program kan Foundation. An apprenticeship ginigibo sa Organic Farm sa San Fernando, Camarines Sur. Nin huli kan programa, nanudan ni Añes na mas kaipuhan atamanon an daga bago kan tanom, huli ta sa daga nagkukua nin sustansya an mga tinanom. Digdi man nahiling ni Añes na bilang sarong estudyante nin Agribusiness, dakul syang pwedeng gibuhon na makakatabang sa lokal na agrikultura. 

Namundag an “Tropikurat” nin huli sa kadakul na suplay nin batag sa saindang uma, naisipan nyang iburo ini nganing gibuhon kuta na nin banana wine. Alagad, napabayaan nyang dai higot an laagan kaya imbis na wine nagin suka, na iyong nagpagana ki Añes bilang provincial awardee sa Young Farmers Challenge na  pinamayuhan kan Department  of Agriculture. 

 Nin huli man sa Tropikurat, nakakatabang na si Añes sa saindang komunidad. Sabi ni Añes, “Kun nagkukulang na an suplay ko nin batag, igdi na ako nagbabakal sa mga kataid mi.” Sa paagi kan Tropikurat, may dagdag ganansya an ibang parauma. An simpleng negosyo ni Añes susi sa pag-uswag bako lang kan saiyang pamilya kundi kan saindang barangay. 

Para ki Añes, nagin tulay an scholarship sa pagpahiwas kan saiyang kaaraman. An pinansyal na tabang kan scholarship, may dugang pang hands-on training sa apprenticeship kan mga iskolar. “Dakulang tabang an scholarship lalo na sa mga arog ming tios. Sana magpadagos pa an programa para dakul pang matabangan na arog kong tios,” an saiyang pasalamat.

“Talagang ipiglalaban ko ining pagklase ko maski mapagal, ta pangarap ini kan bilog ming pamilya. An tulo kong tugang nagpundo muna tanganing ako an makatapos, huli ta dai mi kaya sa pinansyal kun sarabayan kami. Masupog man sainda kun dai ako maghingua.”

More stories