Garage Sale, ginibo sa CCH

Kasabay kan selebrasyon kan aldaw nin mga puso, ginibo an garage sale sa Multi-purpose Hall kan Consuelo “Chito” Heights sa Pacol, Syudad nin Naga kan Pebrero 14, puon alas-syete nin pagkaaga hanggan ala-dyes nin banggi.

Tampok digdi an mga lumang kagamitan kan mga homepartners siring kan mga bado, libro asin kadakul pang iba. Sa paagi kaini, nagkaigwang dagdag na kwarta si mga homepartners mantang an iba, nakabakal nin mga gamit sa baratong presyo.

Lain sa mga “pre-loved items,” o mga kagamitan na dati nang namutan, ipigbida man an mga gibong produkto kan mga homepartners arog na sana kan Homemade Pure Cacao Tablea ni Nida Cultivo.

Huli sa magayon na feedback, plano kan mga opisyales kan HomeOwners Association na gibuhon na ini duwang beses kada bulan sa saindang komunidad.

Sa paagi kan aktibidad, mas nabibisto an Consuelo “Chito” Heights nin huli ta an saindang mga customers may mga naghahali pa man sa mga pagtaraid na komunidad. Nagin tulay man ini tanganing para an mga homepartners makapag-andam para sa mga papaabuton na Trade Fairs arog kan Bishop Francisco Gainza Trade Fair.

An Consuelo “Chito” Heights saro sa tulong CHITO Community kan Foundation. Ini minukna para sa mga pamilyang mayong daga asin harong alagad may kakayahan na maglaog sa sarong kontrata kun sain masasadiri ninda an titulo pakatapos nin treyntang taon o mas halipot pa. Sa mga mawot makabali sa maugmang komunidad kan Consuelo “Chito” Heights magkontak sa 0998 533 1409 o sa Chito Communities, an opisyal na Facebook Page kan Housing Program.

More stories