Doseng (12) iskolars an nag-gradwar sa Central Bicol State Univesity of Agriculture (CBSUA) Pili Campus kan nakaaging Hulyo 15, 2021. Mga kursong katakod kan Agrikultura an saindang tinapusan arog kan BS Agriculture Major in Animal Science, BS Agriculture Major in Agriculture Economics, asin Bachelor in Agricultural Technology. Nin huli sa pandemya, online an ginibong Graduation Ceremonies.

An mga nag-gradwar iyo si Jesil S. Caceres, Nikko P. Madrid, Ivy C. Verdadero, Liezel P. Bolaños, Dioasdado P. Abadines Jr., Jener C. Zamudio, John Paulo A. Elcano, Bernard L. Competente, Rosalie O. Samilo, Argel A. Villareal, Joel R. Sarabillo asin Arven B. Bulalacao.

Susog ki Bernard Competente, dakul an naitabang kan Foundation sa saiyang pagklase, “Bako lang sa financial nakatabang sakuya an CCMF-Bikol, natabangan man ninda ako sa paagi kan Apprenticeship Program kan Foundation, kun sain an mga dai ko natatapos o nagigibo sa eskwelahan nagigibo ko sa Organic Farm kan Foundation sa San Fernando,” sabi niya.

Bilang sarong gradweyt nin kursong agriculture, orgulyo man ni Ivy Verdadero na sya makakatabang sa mga parauma digdi sa Bikol. “An sakuya po talaga na plano sa buhay iyo an magkaigwa nin sadiring swine production, poultry production asin itikan, na kung sain pwede ako mag-empleyo (nin iba). Bako lang sadiri ko an matatabangan ko kundi makakatabang man ako sa iba.” Dagdag pa ni Ivy na mawot nyang ipaaboot sa mga kapwa nya hoben na magin aktibo sa agrikultura nin huli ta an tunay na yaman kan tawo yaon sa kapalibutan.

Para man ki Liezel Bolanos, saro sa mga karahayan kan pagklase nin agriculture iyo an dakul nanunudan manungod sa pagtanom asin pag-ataman nin mga hayop. Nakanuod man sya kun pano magpadalagan nin maganansyang agri-business.

Sa ngunyan igwa na nin 172 na napatapos an Scholarship Program kan Foundation. Tinatawan prayoridad an buot magklase nin Entrepreneurship, Religious Education asin Agriculture. Pinili kan Foundation an mga kursong ini para an mga iskolars magin instrumento nin pagbabago sa komunidad.