“Kaidto, nakikiistar lang kami sa samuyang kapamilya. Ngunyan sa paagi kan Housing asin Microfinance Programs, natawan kami nin pagkakataon na magkaigwa nin sadiring harong, nakapuon pa kami nin mag-negosyo dawa yaon sana sa harong,” ini an pahayag ni Alona Cruzat, homepartner asin Microfinance member sa Consuelo “Chito” Heights (CCH) sa Pacol, Naga City. Saro ang CCH sa mga CHITO Communities kan Foundation.

Susog saiya, dati syang Overseas Filipino Worker (OFW). Alagad, an agom nya nalang an nagpadagos  magtrabaho sa ibang nasyon. Aminado si Cruzat na kulang ang naipapadara kan saiyang agom para sa saindang duwang aki asin sa aroaldaw na gastos. Kun kaya, dai sya nagpundo maghanap nin dagdag na kabuhayan.

Limang taon nang myembro kan Microfinance Program asin tulong taon na sindang nakaistar sa CCH. Sa pagbali nya sa Microfinance, nakautang sya nin kapital.    Ginamit nya ining pambakal mga sangkap asin kagamitan para sa fruit shake asin frozen goods na saiyang inaalok sa mga kataraid. Naglaog man sya bilang sarong reseller nin mga pahamot asin mga health products.

Nin huli ta nagdadakul na an saiyang pinapabakal na produkto, nagkusog an saiyang buot na magpabakal online asin   mag-deliver.

“Kun kamo nagbabalak na mag-negosyo, makakatabang na maray iyan sa pandagdag income. Si igwa na nin negosyo, ipadagos sana nindo. Kumbaga dai kamo mawaran nin pag-asa dawa may pandemya. Dapat positibo sana an saindong pananaw sa buhay tanganing maabot an satuyang mga pangarap,” dagdag niya. Kun buot magbakal kan mga produkto ni Alona Cruzat, pwede syang makontak sa saiyang fb account o sa       numerong 09086338713.

An CHITO (Christian Housing Integrating Trade and Ownership) Community minukna para magdakul an pamilyang Bikolano na magkaigwa nin sadiring harong. Pwera kaini minamawot man kan Foundation na an mga pamilyang nakaistar magkaigwa nin sadiring negosyo, kun kaya nagtatabang an Microfinance Program para magkaigwang dagdag  kapital an mga homepartners. An Housing asin Microfinance Programs pinapadalagan kan Foundation sa pagtaong oportunidad sa mga Bikolano na makahawas sa pagtios.