Dugang na kapital, tulay sa kabuhayan

Nagpundo alagad ngunyan nagpadagos sa negosyo, ini an istorya ni Jocelyn Notado, myembro kan Microfinance, na taga-Siembre, Bombon.

“Kadakul po akong inagihang sakit. An mga aki ko po naghihilang-hilang kan saradit pa, bago po ako nagin myembro,” segun ki Notado. Kan 2012 sya enot na nagbali sa Microfinance program.

“Si bunso kong aki, naospital. Naubos po si samuyang kabuhayan. Si uma nasangra, kaya sinakitan kami. Yaon kami kaidto sa San Fernando. Kan makauli kami digdi [Bombon] may nag-recruit samo sa Madrigal (Microfinance program). Naka-member ako,” dagdag pa ni Notado.

“Nagbukas ako nin tindahan hanggan sa igwa kaming napagkukuanan sa aroaldaw. Si agom ko nakikitrabaho na lang sa uma. Kun anu-ano an ginigibo ko para igwa kaming pagkakitaan. Nagba-buy and sell ako kan may puhunan ako,” istorya ni Notado.

Kan 2013, naaksidente si saro pa nyang aki, asin inoperahan. “Sinasakitan akong maghulog, nag-decide akong magtrabaho sa Naga. Nag-resign ako sa Microfinance kasi sabi ko baka mapabayaan ko ta mayo ako.”

Huli sa kadakul na bayaran para sa operasyon kan aki asin pagklase kan iba pang aki, nagdesisyon si Notado na magnegosyo liwat. “Hanggan sa may nag-recruit naman sakuya kan 2017 yata ito. Nag-member ulit ako.”

Sa higos asin disiplina sa pagkapot nin kwarta, nabawi ni Notado an sinangrang uma, “Hanggan sa sige na an loan ko, nadiit-diitan kong matubos si uma mi. Ma-loan ako, si kabanga pansaod ko sa tindahan, an kabanga titipunon. Masantaon man siguro akong nagtipon para mabawi ko si uma. Sa tindahan, igwa akong income aroaldaw. An uma, every 3 to 4 months bago mag-ani. Hali sa uma, nakapundar ako nin urig. Ngunyan, igwa na kaming baka,” sabi ni Notado. May sadit naman sindang fishpond na dagdag sa saindang kabuhayan.

“Dakula pong tabang sakuya an Microfinance Program. May interes, pero hababa. Samantalang sa luwas, malulubog ka lalo sa utang. Igdi sa Madrigal, mautang ka, semanal ka mahulog, maaraman mo na sana, bayad mo na. Saro pa, dakula an pwede mong sublion.”

“Dai ako nagkamali na magbalik giraray kasi an Madrigal Microfinance dakula talagang tabang sako,” an mensahe pasasalamat ni Notado.

More stories