CHITO Community: patunay nin pangarap asin pagkamuot sa pamilya

Sa pagmundo kan pamilya ni Arnel Arojado, may winalat syang regalo na patunay kan saiyang pangarap asin pagkamuot sa pamilya.

An saiyang ama na si Jovito dating tagatabas nin salming sa sarong optical clinic. An saiyang ina na si Arlene, dating paraluto sa harong kan may sadiri kan clinic. Ngunyan, retirado na si Jovito mantang si Arlene, dai naman nakakatrabaho pagkatapos ma-stroke.

Taon 2018 kan nagin homepartner si Arojado sa Consuelo “Chito” Heights (CCH), sa Pacol, Syudad nin Naga. An CCH saro sa CHITO Communities kan Housing Program. An CHITO, pinalipot na Christian Housing Integrating Trade and Ownership.

Si Arojado nguhod sa tulong magturugang asin sya sarong paratukdo sa Naga City School of Arts & Trades – Junior High School. Kan sya nagpaaram sa kinaban kan Agosto 2025, sa edad na 34 anyos, nawalat sa saiyang magurang an daga asin harong sa Consuelo “Chito” Heights. Asin nin huli sa insurance, dawa pitong taon pa sanang nakakabayad si Arojado, pagado na an kontrata asin pagsasadiri na kan pamilya an daga asin harong.

Segun sa saiyang tugang na si Jonalyn, dai nagin rason an helang para utubon an obligasyon sa harong. “Maski po nasasakitan na sya dai nya po talaga pigpabayaan an hulog sa harong ta iyo po talaga an ipigpundar nya. Kan nakalaog sya sa pagtukdo, ining harong saka daga talaga tulos an ipigpundar nya. Medyo na delay lang po syang bayad kang mga huring bulan nya.”

“Dakula po talaga an pasalamat mi sa Foundation,” pahayag ni Jovito.

An pagkua nin insurance saro sa mga obligasyon na nakalaag sa kontrata kan mga homepartners. Sinsiguro kan Foundation na sa pagkawara kan homepartner, an saiyang pamilya maistar sa harong na saindang masasadiri. Ini an nagigin pamana kan homepartner.

Ngunyan na Marso 2026, pakatapos iproseso an mga papeles sa insurance, mapuon naman an proseso tanganing an titulo kan daga, maibalyo na sa mga nawalat ni Arojado.

Makamundo man asin biriglaan an pagkawara ni Arojado, an saiyang halipot na buhay patunay na an pagtios bakong kaulangan ngani na maabot an pangarap asin an pagkamuot sa pamilya, nagpapadagos sa ikaduwang buhay.

More stories