Sadiring titulo, bunga nin halawig na taon nin sakripisyo

“Mahiwas asin tuninong,  arog kaini ipigladawan ni Felicidad Corpus an saindang komunidad sa laog kan Vicente Heights, saro sa mga CHITO Communities kan Housing Program kan Foundation. An Vicente Heights makukua sa Barangay Pacol, Syudad nin Naga.

An CHITO (Christian Housing Integrating Trade and Ownership) Community minukna kan Foundation tanganing tawan pagkakataon an mga pamilyang mayong pagrugaring na magkaigwang sadiring daga. An Consuelo ”Chito” Heights an saro pang CHITO Community sa Pacol.

Kan 2008 nagin homepartner si Corpus. Ngunyan na taon, an titulo kan daga nasa saiya nang pangaran. Ini patunay na sa Housing Program, an pamilya nagkakaigwang sadiring titulo pakatapos na mapagaduhan an kontrata.

Kagustuhan na magkaigwa nin sadiring istaran an saro sa mga rason na nagsubol saiya na magbali sa orientation na ginigibo kan programa kada Sabado. Istorya ni Corpus maski mayong kasiguraduhan na may bakante pang harong o na sya may dakulang kantidad nin kwarta,  nakipagsapalaran sya na mag-apply sa opisina kan Foundation.

Segun ki Corpus, bakong gabos na nagmamawot na magkaigwa nin sadiring daga asin harong an natatawan nin pagkakataon nin huli ta nag-aagi pa sa higot na proseso kan pagpili nin mga magigin homepartners bago maaprubahan an aplikasyon, “dakulang utang na buot sa Madrigal an magkaigwa ka digdi [nin harong asin daga].  Tapos opportunity ini na dai tinao sa gabos,” dagdag ni Corpus.

“Magbayad ka na sa Madrigal,” ini an saro sa mga pagirumdum ki  Corpus kan enot na program manager, si Mateo Lamit. Arog kan mga ibang homepartners,  nakakaresibi man sya nin surat hali sa opisina kun dai sya nakakabayad sa talaan na aldaw kada bulan. Alagad, imbes na pabayaan na sana an obligasyon, inatubang nya ini asin padagos na naghinguha, “Matinios akong maray kaito,” istorya pa nya. 

Dagdag pa nya na an pagtios kan saiyang pamilya iyo an rason kun tano nagkusog buot syang mag-apply bilang homepartner. Bago sinda nagbalyo sa Vicente Heights, nakikiistar sana sinda asin may mga pagkakataon na nagigin kawsa ini nin dai pagkairintindihan.

“An karahayan lang talaga na mag-istar digdi ta tahimik. Basta an importante, nagbabarayad sinda, dai sinda kayan tatanyugon,” pagirumdom ni Corpus sa mga kapwa homepartner.

Sabi pa ni Corpus, kaipuhan na an sarong homepartner tataong makiiba sa mga kataraning asin may pagmakulog sa lambang saro “Maski digdi, garo ako nakakaangat. Dai pa ko kayan president (kan homeowners association). May mga nagtataong fruits and vegetables. Kaipuhan lang palan, you work hard. You work truthfully. Kaipuhan lang tatao ka makisama”

Ngunyan na nasa pangaran na nya an titulo, nagbunga na an mga sakripisyo ni Corpus. An titulo an nagtataong kapusugan kan saindang pagigin kagsadiri kan daga. Ini man an pangarap kan Foundation, na makataong pagkakataon sa mga Bikolanong pamilya na magkaigwang eerokan na pwede nindang ipamana sa saindang aki sa ngapit na panahon.

Sa mga interesado, magbisita sana sa opisina kan Housing Program tuyong Sabado sa oras na alas dyes nin aga  para sa orientation. An opisina makukua sa 1/F Madrigal Center for Social Entrepreneurship sa laog kan Ateneo de Naga University- Main Campus. Sa orientation ipapaliwanag an kwalipikasyon para magin homepartner asin an saiyang obligasyon sa laog kan kontrata.

More stories