Ngunyan na taon, pinunan kan CCMF-Bikol Alumni Association an #ProjectCoko – School Supply Drive.  An proyekto may obheto na makatao nin dugang na mga gamit pan-eskwela sa 100 na estudyante Grade 4 hasta Grade 6 na mga aki kan mga myembro kan Microfinance sa Brgy. Triangulo, Abella asin Sabang, Syudad nin Naga. Dakul sa mga barangay na ini an mga nagin biktima kan bagyong Kristine. 

An alumni association iyo an grupo kan mga dating iskolar kan Foundaiton. An pagtao kan mga school supplies gigibuhon sa Disyembre 28, katakod kan homecoming kan mga dating iskolar.

Ang #ProjectCoko iyo an piniling titulo kan alumni sa pagtaong onra ki Doña Consuelo “Chito” Madrigal. An ngaran na “Coko” saro sa mga gaha o nickname ni Doña Chito.

Nahaman an plano sa panginot kan  core  group asin ini tulos man sinuportahan kan saindang mga kapwa alumni.

Si Ramona Santelices, Batch 2019, Rachelle Hernando, Batch 2010 asin Kristine Eligoyo kan Batch 2022 an namamayo sa core group.

Mawot kan core group na liwat tawan kolor an saindang aktibidad nin huli ta ini napundo puon kan Covid-19 Pandemic. Para sainda, an pagtao nin mga school supplies sa kaakian, sarong paagi nin pagbalos sa nagin tabang ni Doña Chito sa sainda.

Segun sa core group, saro sa mga nagin adal na saindang nanudan sa pagigin iskolar iyo an “pay it forward,” o an pagbalos sa tabang na inako sa paagi nin pagtabang man sa ibang nangangaipo.

Sa presente, may 217 na nagtapos sa kolehiyo sa laog kan scholarship program kan Foundation puon kan ini minukna kan 2004. Ngunyan na taon, may 53ng mga iskolar an nagkaklase sa Ateneo de Naga University asin Central Bicol State University sa Pili Campus.