Prayer groups kan mga empleyado, nagpapadagos

An mga prayer groups kan mga empleyado kan CCMF-Bikol na minukna kan 2016 nagpapadagos hasta ngunyan na 2025. An pagmukna kan mga prayer groups parte kan Formation Program kan CCMF Bikol para sa mga empleyado tanganing makataong giya sa “spiritual formation” asin magin pagkakataon nin pagtalubo sa pakikipag-kapwa.

Segun ki Mark Rustia, “bilang sarong prayer leader, nanudan ko na ini an sarong paagi para makabiristo pa lalo an mga kairiba [ta] sa trabaho, maaraman an mga sakit o mga saloobin ninda sa saindang pagbuhay na dai ninda masasabi kun kisay. Saro pa sa sakong mga nanudan na dapat pahalagahan pa an pag-prayer meeting ta igdi lang nagkakaigwang oras an ibang empleyado na makapangadyi, maghagad nin guidance sa Mahal na Dyos.”

An CCMF-Bikol main office sa laog kan Ateneo de Naga Universiry igwa nin pitong prayer groups na may pito hanggang sampulong myembro na hali sa man iba-ibang opisina kaini arog kan Accounting, Administration, Microfinance, Housing asin Human Resource, General Services asin Coko Café. May saro man na prayer group an lambang sanga kan Microfinance Program na pinapamayuhan kan Branch Manager bilang prayer leader.

An mga prayer groups bako sanang prayer meeting an ginigibo; igwa man ining mga aktibidad siring kan pagpa-Misa kada primerong Biyernes kan kada bulan. An Misa ginigibo sa Christ the King Church kan Ateneo de Naga University. Ini inaatendiran kan mga empleyado kan CCMF-Bikol, mga estudyante asin empleyado kan Unibersidad. Igwa man ginigibong pag-nobena ki Nuestra Señora de Peñafrancia kada bulan nin Setyembre, asin an pag-Santo Rosaryo sa bilog na bulan nin Oktubre.

Linalauman kan mga prayer groups na ngunyan na taon magkaigwa nin aktibidad kun sain makakaiba ninda an mga benepisyaryo kan mga programa kan CCMF-Bikol. Ini sarong paagi nin pagpapasalamat sa mga biyaya na winawaras sainda kan Kagurangnan.

More stories