Negosyong BBQ, nag-asenso sa tabang kan Microfinance

“Dai po ako nagduwa- duwang magbali [sa Madrigal]”, pahayag ni Jessebel Quan, myembro kan Microfinance sa St. John the Baptist Center kan Iriga Branch.  

Kan 2003 nagpuon si Quan sa saiyang negosyo. Dai nakaplano asin dai man hilig kan pamilya an pagnegosyo asin pagluto. “Pasabong lang sya kan Mahal na Dyos. Mayo po kaming plano basta naglaog lang sa utak ko, ma-BBQ ako. Iyo po ito, may 100 pesos ako. Sabi ko iyo ini an ipuhunan ko sa BBQ ko,” istorya ni Quan.

Kan 2015 nagbali si Quan sa Microfinance asin an dagdag kapital nagin susi na magdakula an saiyang negosyo. “Nakapagpagibo na po kaming ihawan, ikatulo na po iyan. Ngunyan, magayunon na si ihawan   mi, halabaon na, stainless na.

Itong laagan ming BBQ, naka-istante na, naka-stainless na man po saka yung mesa namin stainless din.”

Kan 2021 inot na nagluwas sa Bunabon    an istorya ni Quan.  Sa 3ng taon, nagin marikas an pag-asenso kan saindang pagbuhay. “Nakabakal na po kaming sadiring daga saka nakapagibong sadiring harong, dai mi na po mararanasan na pag nagbabagyo, nakikisirong sa ibang harong.”

Sa laog nin 2ng dekadang pagnenegosyo, nakatapos nin kolehiyo an saiyang tulong aki. An saro, katabang na nya sa negosyo. 

“Dati po nahihirak ako sa aki ko ta paghali sa eskwela, diretso na sa pwesto mapaypay ng BBQ. Maski naka-heels pa ta required sa school, pero dai po sya nasusupog,” dagdag pa nya.

“Sa pag-manage, dapat tatao ka magkapot kan kwarta ta kun dai mayong matatada. Ipahuri an kapritso o an mga bagay na dai man importante. Kami, an priority mi si pagkakan, si business. An kwarta, igwa sa business, igwa sa pagkakan. Para dai ka mawaran nin kwarta,” paghiras ni Quan kan saiyang diskarte sa pagkapot nin kwarta.  

More stories