Dugang na kapital, dugang na negosyo

Doseng  taon nang myembro si Arlen Roquino kan Microfinance Program sa Antipolo 1&2 Center kan Naga West Branch. Sya taga-Antipolo, Minalabac, Camarines Sur.

“Sa umpisa, syempre nag-isip ako. Pag ako nagkua digdi [loan] sain ako makua nin pambayad, mayo man akong hanapbuhay. Si agom ko lang an inaasahan mi.”

Naggibo asin nagtitinda nin ice cream an saiyang agom na si Neo. Digdi sinda nagkukua kan saindang panurualdaw na gastos. Alagad, segun ki Roquino, an pagnegosyo nin ice cream, seasonal sana man. Kun taguran, dikit man an saindang benta. Kan sya makakua nin dagdag kapital sa paagi kan microfinance, naisipan nyang magpuon nin ibang negosyo ngani na parehas na sinda kan saiyang agom na igwa nin pagkakakitaan. “Puon kan paglaog ko digdi (Microfinance program), naka-sustain ito sako. Duman ako nakakakua nin dagdag pagkakakitaan,” istorya ni Roquino.

“Nagkaigwa ako nin idea dahil sa bilas ko, hinikayat nya ako, pero totally bako akong mahilig sa mga microfinance na an. Habo kong obligasyon, ta mayo man kaming ibang pinagkakakitaan,” dagdag pa ni Roquino.

An pagkakaigwa nin savings mantang nakakasubli nin kapital an nagin inspirasyon ni Roquino sa pagbali sa programa. “Bukod sa loan, may benefits ka arog kan special savings na pwedeng makua insigida.”

“Padikit-dikit kada loan ko nagbabakal ako nin computer set hanggan sa magkaigwa ako nin 10 sets nin computer. An nagin katabang ko dyan si pamangkin ko tapos si aki ko, nagpatabang ako na makanuod. Ta mayo po akong pag-aram sa keyboard, monitor.”

Sa ngunyan, huli ta kadaklan sa saindang lugar, nagkaigwa na nin mga sadiring laptop asin

computer sets, nagkapital naman si Roquino sa bago nyang negosyo, an printing business o pag-print nin mga dokumento, imbitasyon asin iba pa. Gamit an internet, naglo-load man sya nin mga cellphone. An mga ini patunay na an kapital na hali sa microfinance, pwedeng magbunga nin maniriba-ibang negosyo.

Tugon ni Roquino sa mga mawot man magnegosyo: “Dapat willing ka talaga makanuod.”

More stories