Kan Agosto 23, nagtiripon an mga namamayo kan Homeowners Association kan Consuelo “Chito” Heights, an saro sa tulong subdibisyon na inaapod CHITO Community, na pinapadalagan kan Housing Program. An CHITO, buot sabihon Christian Housing Integrating Trade and Ownership.

Presente an incoming asin outgoing na mga opisyales asin ipinabisto man an bagong Program Manager na si Israel Denava. An tiripon ginibo tanganing makapag-ulay an lambang lado asin man maipasa na sa mga bagong opisyal an mga responsibilidad sa pagpadalagan kan asosasyon asin kan komunidad.

An pahalion na mga namamayo pinapanginotan ni Sanny Mendez bilang presidente. Saiya man na ipinasa an saiyang responsibilidad ki Francia Galicia, an bagong presidente. Kaiba an outgoing secretary na si Ahleen Ernesto, si Sanny Mendez nag-turnover man kan mga dokumento siring kan listahan kan mga homepartners, masterlist kan monthly dues, listahan kan koleksyon, mga gastos, asin iba pa. Ini man inako kan palaugon na presidente na si Galicia asin kan bagong treasurer na si Carlo Velasco kaiba an assistant treasurer Efren Gan Jr. Sinabi man ni Mendez sa mga bagong opisyal na bilang mga namamayo kan komunidad, saro sa obligasyon kan mga opisyal iyo an pagdangog kan mga reklamo kan mga homeowners asin pagsimbag sa mga reklamong ini bilang lupon. 

Si Denava nagpaabot man kan saiyang mensahe. Hinagad nya sa mga pahalion na mga opisyal na suportahan man giraray an mga bagong opisyal sa saindang pagtrabaho tanganing mas mapamarhay an pagsirbi sa kumunidad.

Segun man ki Galicia, saro sa saindang tatawan duon iyo an pagkolekta kan monthly dues para sa mga proyekto para sa seguridad, livelihood o kabuhayan, asin programa para sa salud. Dagdag pa ni Galicia, kaipuhan nin bastanteng pundo tanganing mas mapagayon an mga proyektong para sa karayahan kan komunidad. 

Pangarap kan Foundation na an lambang CHITO Community magin ehemplo nin pagkakasararo sa pagtulod nin kauswagan. An Vicente Heights sa Pacol, Syudad nin Naga asin an Madrigal Homes, sa Calangcawan Sur, Vinzons an duwa pang CHITO Community kan Housing Program. 

Sa pangenot kan mga bagong elihir na opisyales ginibo man an General Assembly kan Agosto 31, sa CCH Multipurpose Hall.