Titulo kan daga: patunay nin paghingua asin paglaom

Istorya ni Elenita Morano bago nakalaog sa programa, sinda nag-aarkila, “Pag nag-aarkila ka lang pag dai ka nakakabayad, papahalion ka. Pagyaon na an may kagsadiri makikiulay ka, syempre maaanggot saimo.”

Taon 2008, kan maaprubahan an aplikasyon ni Elenita asin kan saiyang agom na si Vicente sa CHITO Community sa Pacol, Syudad nin Naga. “Madali sya [proseso] basta kumpleto lang requirements mo, honest ka lang, mayo ka nin daga, mayo ka nin property.”

Segun ki Elenita, an pagbabayad bulan-bulan garo man sana bayad sa arkila alagad mas maray kisa kan nag-aarkila sana. “Kun pirmi ka lang nagre-rent, sa kahaluyan dai man mapapasaimo. Digdi kahit sabihon mo man na nagbabayad, pag-abot kan panahon saimo na nanggad.”

Kan 2008, nasulo an pwestong saindang inaarkilahan. Yaon duman an saindang sadit na negosyo. “Kahit nasulo, blessing in disguise, igwa naman kaming malilipatan. Kaya pasalamat man giraray kami ta dai na kami nakiistar kun sain.”

Nawaraan man nin negosyo, dai nawaran paglaom an mag-agom. “Back to zero kami. Nag-irahay appliances an agom ko. Ito na an samong source of income.” Sa saindang harong sa Pacol nagpuon magbangon an pamilya. Alagad dai ini nagin madali. Kan panahon na idto, an duwa sa apat nindang aki, nasa college. 

“Nag-abot sa punto na kaipuhan kong magpili kun harong o an pag-adal kan aki ko. Mayo ako igi-give up. Pero talagang marahayon an Mahal na Dyos,” dagdag pa ni Elenita. Kan nagkatrabaho na an saindang aki, nagtabang man ini sa pagbayad para sa harong.

“Kadakul challenges, dai ako nag-give up. Dai ka man maka-full pagbayad, at least makabayad ka. Pero dapat inuton an harong saka na an mga wants, needs muna.”

Sa laog nin kinseng taon, nakua na ninda an titulo kan saindang daga, “Sa herak nin Dyos, bayad mi na ini, may title na kami. Kaya dakulang pasasalamat talaga, maski sabihon mo nag-agi kaming rough road, pero sa kahaluyan, nagkaigwa man giraray magayon na dalan an buhay mi. Dakula an pasasalamat ko ki Doña Consuelo ta mayo ka nang mahihiling na arog kaning housing. Salamat, ta kun mayo ini [Housing Program], nasain kami.”

More stories