Nobena asin pyesta ni San Jose Obrero, isinelebrar sa VHS

Kan Mayo 1, nagselebrar kan pyesta ni San Jose an mga pamilya sa Vicente Heights Subdivision (VHS), sa Pacol, Syudad nin Naga. An VHS saro sa mga CHITO Communities kan Foundation. Nagkaigwa nin Santa Misa sa pangenot ni Fr. Marlon E. Eleosida, an kura paroko kan Our Lady of Mount Carmel Parish sa Carolina, Syudad kan Naga.

Segun ki Felicidad Corpus, Presidente kan Homeowners Association, nagkaigwa man nin karakanan asin iba pang mga aktibidad, “May Mass kami 8:00AM, tapos nag-potluck. Gulpi si mga kakanon. Although bakong 80% an nag -attend, ogma si Padi ta gulping mga aki an nagsimba.”

Istorya ni Maria Luisa Jallores, saro sa mga  homepartners, “An mga homepartners may darang kanya-kanyang kakanon o potluck asin arambagan nin mga papremyo sa ginibong pakawat. Nagpuon si pakawat ala-una, hanggan hapon igwa kami nin activity.”

An selebrasyon kan Mayo 1 nagin maugmang katapusan kan nobena na ginibo kada banggi bago kan pyesta. Dagdag ni Jallores, kada taon, ginigibo an pyesta sa komunidad alagad mayo nin dakul na mga aktibidad kumpara ngunyan na taon, “An usual fiesta igdi marayo, garo mayo lang. Last year, pagkatapos kan Misa may karakanan, may baraylihan man. Ngunyan ginibo naman nin aga an okasyon tapos pakawat naman sa mga aki.”

An pangapudan ni Corpus sa mga kaibahan sa komunidad, iyo an makisumaro sa ginigibong mga aktibidad nin huli ta mawot ninda an padagos na pagkakasararo sa komunidad asin magkaigwa nin oras kan pag-urulay-ulay sa tahaw kan kasiributan.

Lain sa VHS, an Consuelo “Chito” Heights an saro pang CHITO Community sa nasabing barangay. Sa mga interesado magin parte kan programa, pwedeng mag-kontak sa Housing Office sa 0998 533 1409.

More stories