Bako lang higos kundi sinabayan man nin diskarte. Ini an pinatunayan ni Edna Agripa, sarong paraumang-negosyante asin presidente kan Magarao Vegetable Growers Association o MAVEGA.

Nagin myembro kan Microfinance program si Edna kan 2013. Siya taga-Carangcang, Magarao, Camarines Sur. Kaiba an saiyang agom, nagpuon siyang magtanom asin magtinda nin manlain-lain na gulay arog kan okra, kalabasa, kalabasang puti, asin tapayas.

“Nagamit ko po an sakuyang nakuang pang kapital para makabakal nin mga kaipuhan sa pagtatanom arog kan abono. Kan nagkaigwa nin pandemya, nagin paagi an pagtatanom para may mapagkuanan nin kakanon sa aroaldaw asin pangkabuhayan.” istorya ni Edna. Sa arog kaining sitwasyon, ipinapasalamat ni Edna na siya myembro kan Microfinance program.

Dai nagpundo si Edna na maghanap nin dagdag na negosyo para magdakul an saiyang ganansya. Segun ki Edna, nakanuod siyang maggibo nin pipino chips sa paagi kan sarong programa kan Department of Trade and Industry (DTI) – Camarines Sur. “Duman po sa training, tinukduan kami kan sarong chef, nakanuod kami kun pano an tamang proseso nin pagluto, partikular an pipino.” dagdag niya.

Ngunyan nakakagibo sinda nin 180ng patos nin pipino chips kada aldaw asin minadepende man ini sa mga order. An mga sangkap, hali sa mga tinatanom nindang gulay. Kaiba niya sa pagtatanom an duwang myembro kan Microfinance asin sinda, kabali man sa paggibo nin pipino chips.

An mga pipino chips naipapabakal puon kinse pesos an sadit na patos hanggan sitenta pesos an pinakadakulang patos. Igwang apat na flavor: plain, barbeque, cheese, asin sour cream.

An negosyo ni Edna sarong ehemplo kun papano an pagtanom nin gulay pwedeng magin susi sa mas dakulang ganansya.

Sa mga interesado mag-order makokontak sinda sa numerong 09093816401 o pwede man mag-order online, sa website kan omgainza.com. Makukua man sa website na ini an produkto kan ibang myembro kan Microfinance arog kan Bilao, Tablea, Tabasi, asin mga libro arog kan An Profeta, asin An Sadit na Prinsipe.