An istorya ni Rachelle Ann A. Hernando, dating iskolar kan CCMF-Bikol na ngunyan iyo na an Farm Operations Supervisor kan MIFTP, sarong ehemplo nin pagtalubo sa ngaran nin paglingkod asin pagpadangat sa banwaan. Nagtapos si Rachelle sa kursong Entrepreneurship kan 2017. Ngunyan, apat na taon na siyang empleyado na nagmamangno kan Programa.

“Ini mayong suba, pero pinangarap ko talagang magtrabaho sa Madrigal. Ini nin huli sa apprenticeship,” sabi ni Rachelle. An apprenticeship, sarong kabtang kan scholarship program kun sain an mga iskolar nagtatrabaho sa manlain-lain na programa kan Foundation. Nin huli digdi nagiyahan sya kan gayon kan katuyuhan kan Foundation na makatabang sa mga tawo, rason kun tano saro sa pangituragan nya an magtrabaho sa Foundation.

Dawa na sa hiling nya kan inot dai susog sa tinapos nya an saiyang trabaho, orgulyo ni Rachelle na ngunyan parte sya kan CCMF- Bikol. “May parte na maisip ka na Entrep ka tapos parauma ka, may dakulang pagkakaiba.” Dai nagin madali an saiyang trabaho lalo na kan sya nagpupuon pa lang, alagad nagin susi an pagigin bukas an isip sa mga bagong kaaraman. “Sige akong dangog nin mga kaaraman hali sa mga parauma asin paraorig,” sabi ni Rachelle.

Dagdag pa nya, dakulang tabang an kursong Entrepreneurship. “Napatibay kaini si mga skills ko, na iyo an ginagamit ko ngunyan sa pagtrabaho nin Farm.” An Entrepreneurship, Religious Education asin Agriculture an mga kurso kan mga iskolar kan Foundation, huli sa katuyuhan na magin andam an mga iskolar na maglingkod sa kapwa.

“Gabos na nangyayari, gabos iyan may magayon na rason,” paghiras ni Rachelle kan saiyang paghurop-hurop dapit sa mga agyat katakod kan saiyang trabaho. Ini patunay kan saiyang dedikasyon na magtalubo bako lang bilang sarong empleyado kundi sarong Bikolanong may pagmakulog sa banwaan.

Lugod magdakul pa an mga Bikolanong hobenes na madusay kan saindang kakayahan para sa agrikultura asin pagnenegosyong mapaurog kan lokal na ekonomiya.