Sa kamawotan na makabalos sa tabang asin maipadagos an legasiya ni Doña Chito, pinagmarhay ni Moneka Amandy asin Camille Tabinas, mga iskolar kan Foundation, na padakulaon an saindang sadit na negosyo na nagpuon bilang requirement sa saindang kursong Entrepreneurship. “We want to pay it forward,” pahayag ni Moneka.

Naisip kan grupo ni Moneka asin Camille na gamiton an corn silk o buhok kan mais, huli ta ini an primerong produkto kan saindang lugar, “As Entreprenuership students of Ateneo and Madrigal scholars, we are honed po na magin makitao. Kaya nag-isip po kami kun pano makatabang sa iba. Tig-aram mi po kun ano an abundant crop sa Calabanga, which is na-found out mi po na mais. An buhok po baga nin mais, inaapon lang, kaya tanganing makatabang sa mga paratinda, imbes na iapon an mga buhok, binakal mi po para gibuhon na tsaa.” Ma-8ng bulan na naggigibo nin corn silk tea an grupo ninda Moneka na iyo an primerong produkto kan Cali Naturals, an negosyo kan saindang grupo. Katabang sa pagpapadalagan kan Cali Naturals an saindang kaklase asin kagrupo sa Income Generating Project (IGP) na si Danica Caña asin Ria Candia.

Segun man ki Camille, lain sa pagtabang sa mga paratinda, mawot man nindang iwaras an karayahan sa salud kan saindang produkto, “Since po our product is 100% natural, dakul po ining health benefits. Natural diuretics po an samong tea na nagki-cleanse kan hawak asin nakakatabang sa pagbulong kan Urinary Tract Infection (UTI).” Naggradwar an bilog na grupo kan Hunyo 25 kaya mas lalo sindang nagmamawot na ipadagos an negosyong napunan. “Plano mi talaga po na ipadagos pa asin mas i-introduce pa ini sa market,” dugang ni Camille. “Naisip mi po na why not create an impact even outside the school? Tano ta dai mi ipadagos?” dagdag pa ni Moneka.

Plano ninda na mas pahiwason pa an saindang market sa paagi kan pagdagdag nin produkto, “Magibo po kami nin another form of drinks, cold drink po. Bottled corn silk tea po na isi-serve na malipot. Mga hobenes naman po an target market kaini.” Sa mga mawot magbakal kan corn silk tea kan Cali Naturals, magkontak sana sa saindang opisyal na Facebook page asin Shopee seller account: Cali Naturals.