Si Meriam Nollora asin ang saiyang mga produkto, sa ginibong Trade Fair kan General Assembly kan CCMF-Bikol.

Para ki Meriam Nollora, an tunay na pagnenegosyo bako sana sa pagpabakal nin produkto; ini manungod sa tamang pagpamidbid, daing untok na pag-adal asin kusog nin boot na akuon an lambang oportunidad.

Puon kan 2017, si Nollora nagin aktibong myembro kan Microfinance Program. Sya taga-San Fernando na nasasakupan kan Naga West Branch. Bilang sarong beterano sa mga Trade Fair, saro na an saiyang lalawgon sa mga pamilyar na exhibitor sa mga darakulang aktibidad sa Bikol arog kan Bishop Francisco Gainza Trade Fair kada Setyembre. Sa lambang pagsali ni Nollora, bako sanang produkto an saiyang dinadara kundi an bilog na orgulyo kan saindang banwaan.  

Dakula an pasalamat ni Nollora sa Department of Trade and Industry (DTI) na nagin katuwang nya sa trayumpo. Huli sa mga training asin programa kan DTI, naghiwas an saiyang kaaraman sa packaging asin diskarte para makasabay sa modernong merkado. Ngunyan, bistado na an saiyang mga produktong gibo sa mushroom asin dakul na an nagbabakal nin mga chips na gibo sa mushroom. 

Segun ki Nollora, an mga trade fair an nagsisirbing “makina” kan ekonomiya sa Bikol. “An mga trade fair nakakatabang samuya na i-promote an samuyang mga produkto, bako sana sa sadit na komunidad, kundi sa bilog na rehiyon,” saiyang paliwanag.

Dugang pa nya, an pakinabang kan pagbali sa trade fair bako sana sa ganansya, kundi pati na sa “happiness factor”—an kaugmahan na may mamidbid na mga bagong katuwang sa negosyo asin an makipagtabangan sa ibang negosyante.

An Microfinance Program nagtutulod sa mga myembro na magbali sa mga trade fair tanganing maipabisto an saindang mga produkto. Aprewa sa pagpasubli nin dugang na kapital, nagtatabang an Foundation na irani an mga saradit na negosyanteng Bikolano sa mga ahensyang may mga programa para sa lokal na ekonomiya.

More stories