“Kan enot po, dai man po ako interesado na maglaog sa Microfinance, ta sabi kayan halawig an bubunuon sa paghulog. Alagad, na-realize ko, ano daw kun maglaog ako, ano man daw makukua kong mga benepisyo? Kaya nagprobar ako maglaog, ” pahayag ni Evelyn Tena, Center Chief kan Abella Center, Naga Central Branch, na ngunyan na Hunyo, 15ng taon nang myembro kan programa. Katabang an saiyang agom, nagpuon si Evelyn sa pagigin sadit na negosyante nin gulayan sa Naga City Public Market. Ngunyan, igwa na sya nin sari-sari store sa saiyang harong na búnga kan higos nindang mag-agom asin kan dagdag kapital hali sa Microfinance. “May gulayan po kami sa 3rd floor kan Market, wholesale and retail, tapos may tindahan na po ako ngunyan. Katas na po yan nin Madrigal.” Dawa dipisil pa an pagbuhay dara kan pandemya, dai gayong nasasakitan si Evelyn na padalaganon an saiyang negosyo. “Sa kahaluyan ko po digdi [sa Microfinance program], dakul na akong na-atindiran na mga seminars asin livelihood [training], na kun minsan si mga adal na nakua ko, pagmaluya an samong negosyo, nagagamit ko pong pangsuporta sa samong pang-arualdaw na pagbuhay asin negosyo.”

“An negosyo mi kaya nasa panahon. Pag may bagyo, mayo. Pag tag-init, kulang [an supply]. Kaya swerte talaga ako na nakasali ako sa mga seri-seminar, ta mala po may tindahan na ako,” dugang pa nya. Segun pa ki Evelyn, dakol pa syang nakuang benepisyo kan naglaog sya sa programa, “Nakanuod po akong mag-savings, nakalaog po ako sa insurance, bako lang ako, kundi an bilog kong pamilya. Kaya ugma talaga ako.” “Dapat focus ka sa negosyo. Dapat inaataman an komunikasyon sa mga suppliers asin customers. Syempre, dapat dai malingaw magrani Saiya,” pagirumdom ni Evelyn. Dagdag pa nya, dapat an mga myembro magin madiskarte asin handa magsunod sa mga reglamento kan Microfinance tanganing mas pulido an dalagan asin relasyon sa programa.“Si mga arog ko na sadit na mga negosyante o mga mapuruon pa sana, kun kaipuhan nindo nin tabang sa pagbilog nin kapital, bukas an Madrigal para sa pagtabang.” Segun pa saiya, kun may mga kahaputan manungod sa programa, pwede man syang bisitahon sa harong ninda sa Abella, Naga City.