Taga-Ocampo asin taga-Bombon, gana sa Search for Most Improved Enterprise

Ginibo kan Mayo 8 an ikatulo asin huring kabtang kan Search for Most Improved Enterprise kun sain pinili kan mga hurado an mga nangganang myembro kan Consuelo “Chito” Madrigal Microfinance.  Makalihis an ginibong validation o an pagbisita sa mga harong asin negosyo kan kwalipikadong myembro, 4 sa Category 1 an nakapasar para ma-interbyu kan mga hurado. Sa Category 2, 11 an nakapasar.

An mga hurado iyo sinda Department of Trade and Industry Camarines Sur Provincial Director Jay Percival Ablan; Dean Anne Marie F. Bagadion kan Ateneo de Naga University College of Business and Accountancy; Leciel Ramos, dating iskolar kan CCMF-Bikol asin paratukdo sa Bicol State College of Applied Sciences and Technology asin si Fr. Wilmer S. Tria, an Chief Executive Officer kan CCMF-Bikol. Kan Mayo 18, tinawan premyo an mga nanggarana.

Nagpuon an aktibidad sa Santa Misa sa pagrumdom sa kaaldawan kan nagmukna kan Foundation na si Doña Consuelo “Chito” Madrigal. Pakatapos kan Misa, ginibo an  awarding ceremony kun sain presente an labing gatos na empleyado kan Foundation, kaiba an mga iskolar asin magkapirang homepartners.

Si Jocelyn Notado, kan Siembre Bombon 3 Center, Calabanga Branch, an ganang 1st place sa Category 1 o an mga 3 hasta 5ng taon nang myembro kan program.  Ikaduwa si Magdalena Bolano  kan Minalaba Center, Caramoan Branch asin ikatulo si Orlie Austria sa Sitio Bogitis, Paolbo Center,  Calabanga Branch.

Istorya ni Notado dai na sya naglalaom na manggana, “Nagpapasalamat po ako sa Mahal na Dyos ta madadagdagan po an laog kan sakuyang tindahan.” Lain sa tindahan, igwa si Notado nin piggery asin fishpond. Nagluluto man sya nin mga kakanin asin tabang sindang mag-agom sa pag-uma nin paroy.

Sa Category 2 o an mga lagpas 5ng taong myembro, ginana an 1st place ni Emily Villanueva, kan Lidong Center, Ocampo Branch. Ikaduwa si Jessebel Quan kan St. John the Baptist Center, Iriga Branch asin ikatulo si Evelyn Tena kan Abella Center, Naga Central Branch.

Segun ki Villanueva, dai pa sya suboot makatubod na sya an nanggana sa Category 2. “Ugmahon ako na nakaiba ako sa primero pa sanang pag-interview sa harong [validation phase]. Sabi ko, kun halimbawa dai ako makaiba at least, nagsali ako.” Nagpuon si Villanueva sa pagtinda nin mga gamit sa harong arog kan banig asin samhod. Ngunyan, nabakal na nindang mag-agom an daga na kinamumugtakan kan saindang sadit na grocery. An mga nagganang 1st Place, may premyong Beynte Singko Mil Pesos; 2nd Place, Kinse Mil;  3rd Place, Dyis Mil.  An mga cash prizes hali sa karahayan buot ni Susana AS Madrigal, an saro sa mga pamangkin ni Doña Chito asin namamayo kan CCMF. Nagtao man nin Entrepreneurship in Tourism Award, sarong special award sa pagmidbid kan negosyo ni Nena Icaonapo kan Paniman 2 Center, Caramoan Branch. Sya nakakua man nin 5,000 pesos.

An mga magagayon na istoryang ini kan mga myembro kan CCMM na nagbarali sa Search for Most Improved Enterprise ilalaag sa librong gigibuhon dapit sa legasiya ni Doña Chito.

More stories