“Kun ano an kaya kan iba, kaya ko man. Dai lang magsablay,” pasubang mensahe ni Salvacion Nanio, sarung Microfinance member asin Center Chief  kan Laganac Center sa Balatan na nasasakupan kan Nabua Branch.

Solong babae sa walong magturugang, dai hunaon ni Salvacion na sa edad na tres anyos, magkakahilang syang polyo. Nin huli kani, dai nagin normal an pagdakula kan saiyang tabay asin bitis, rason kun tano dai sya nakakalakaw nin tanos. Sa presente, 55 anyos na si Salvacion.

Supog an nanginot ki Salvacion kaya dai na sya nagpadagos sa pag-adal. Dai naman sya naghanap nin makakaibanan sa buhay. “Dai ko na po naisip na magkaigwa nin ilusyon ta aram ta naman yan, baka insultuhon lang.” Alagad, sa tabang kan saiyang pamilya, dai nya namati na solo sana sya asin nanudan nyang akuon an saiyang kondisyon. “Maray sana ngani po na dai sako pinapamati kan mga kairiba ko kun ano an kulang sako,” dagdag pa ni Salvacion.

Segun pa ki Salvacion, dawa nuarin dai nya binasol an saiyang magurang na sya naghilang. “Kusog buot an kaipuhan ta kami  sana an matabang sa sadiri mi. Dai man kami pwedeng mag-asa na sana sa magurang o sa iba. Kaya dapat kusugan an buot asin magsarig sa Dyos.”  

Kaya labi sana an pasasalamat ni Salvacion na nagin myembro sya kan Microfinance Program. Nakamati sya nin paglaom. Dawa nasa harong, may hanapbuhay sya. “An nakukua ko po [na loan], pandagdag nin pambakal gamit sa pag-manicure, pedicure, saka bulong pang-rebond ta sa harong man sana po ako nag-aako nin mga customer,” dagdag pa nya.  

Ikinaugma man ni Salvacion na sa Microfinance Program kan Foundation, mas hababa an interes kun PWD o person with disability, an myembro. “Ginhawa po para sako, ta sa arog ko, 2% lang po an interes na hinahagad sako mantang 3% po sa iba,” patotoo ni Salvacion.