Negosyo asin pagtubod, sabay na nagtatalubo

An pag-uswag kan negosyo asin pagrarom kan saiyang pagtubod an nagin bunga kan pagigin myembro ni Merlina Pellas sa Microfinance Program kan Foundation. Sa presente, si Pellas an center chief sa Mabalodbalod Tigaon Center kan Ocampo Branch.

Sa laog nin 14ng taon na pagigin myembro, urog an saiyang pasalamat sa Foundation. “Pasalamat ko sa Foundation ta dati may sari-sari store lang akong sadit ngunyan nagkaigwa na man akong sadit na kakanan tapos urigan,” pahayag ni Pellas.

Nakapatapos na man sya sa kolehiyo kan saiyang tulong aki. An nguhod na si Precious nagin saro sa mga iskolar kan Foundation sa Ateneo de Naga University sa laog nin apat na taon. Sa saiyang pasalamat, sinabi ni Merlina, “Salamat, dakulang pasalamat ko sa Foundation. Nakapatapos ako sa Ateneo na dai ako nagbabayad nin tuition asin patotoo ini sa center mi, sa mga kapwa ko myembro, na igwa talagang Scholarship Program an Foundation kun sain pwedeng mag-apply an saindang mga aki.” Sa aspeto kan pagtubod, bago pa man mag-ayon sa programa, aktibo na si Pellas sa mga programa kan Simbahan, alagad mas nagrarom an saiyang debosyon kan sya magin sarong prayer leader. Naimpluwensyahan nya man an saiyang agom na magin aktibo, asin ngunyan saro na ining lay minister sa saindang parokya, sa St. Peter Baptist Parish sa Old Moriones, Ocampo, Camarines Sur. Si Precious nagin man sarong commentator na naglilingkod sa mga Misa kan parokya.

Sagkod sa ngunyan, padagos si Pellas sa paghingua na magtalubo an saindang prayer group asin sa pagpalakop kan Basic Ecclesial Community (BEC) o Saradit na Kristyanong Komunidad (SKK) kan saindang parokya.

Nagmamawot an Foundation na an mga myembro kan Microfinance magkaigwang hararom na pagtubod asin magin aktibo sa saindang mga parokya. Kun kaya padagos man an Foundation sa pagpaluwas kan Lectio Divina kada bulan tanganing may giya an mga centers sa saindang mga prayer meetings.

More stories