Hilig sa mga burak, ini an nagtulod ki Elnora Chavez, Microfinance member kan Public Market sa syudad nin Naga, na magmukna kan saiyang sadit na negosyong flower shop.

Ma-32ng taon ng pinapadalagan ni Elnora an saiyang negosyo. Alagad, segun saiya dai mawawara sa negosyo na mangaipo nin pandagdag kapital kaya minawot nya na maglaog sa Microfinance program. “Haloy ko na pong mawot na maglaog ta may center po sa Pacol na harani samo. Alagad dai po ako naglalaog ta may center meeting, dai ko mabayaan an sakong negosyo. Kaya labi-labi an pasasalamat ko po na igwa na nin Microfinance program para sa mga stall owner sa mga public market.”

“Magayon pati po sa Madrigal ta igwa nin microinsurance, igwa pa nin savings, ta syempre po naggugurang na, kaipuhan na nin insurance. Tapos naidadagdag mi pa na pangkapital sa negosyo ta nakakasubli kami,” pahayag pa nin Elnora.

Ngunyan, 5ng taon na si Elnora na myembro kan programa. Segun pa saiya, inalok nya man an saiyang mga kaibahan sa market na maglaog sa Microfinance, “Kan paglaog ko po, inalok ko man si mga kairiba ko po na may sadiri man na flowershop kaya ngunyan nasa sampulo na po kami digdi na myembro na nagnenegosyo nin burak.”

Ginirumdom man ni Elnora si enot nyang sinubli na kapital. Segun saiya, binakal nya ini nin urig, “Si pinaka-enot ko pong nasubli, binakal ko nin urig kaya igwa na ako ngunyan duwang anayon. Si nagsunod po pinandagdag ko na kapital sa negosyo ko.” An magkaigwang saradit na negosyo benepisyo kan pagigin myembro kan programa.

Ngunyan na Nobyembre, kun sain ginigirumdom kan lambang saro an aldaw kan mga santo asin mga kalag, doble man an pag-andam ni Elnora nin huli ta nagbabalik na sa dati an kusog kan barakalan nin burak, “Ngunyan po bukod sa doble an pagpreparar ta dakul na pong nagbabakal, doble man po an kaipuhan na kapital tanganing mag-rolling an samuyang puhunan,” kaya siring ki Elnora, dakulang tabang sainda na igwa nin Microfinance na yaon sana sa pagtabang sa mga saradit na negosyo sa public market.

Nagtao man nin mensahe si Elnora sa mga mawot na magmukna nin sadiri nindang flowershop, “Sa mga mawot na magkaigwa nin arog kaining negosyo, dapat igwa kamo nin passion sa pag-arrange nin burak saka dakula an pagkamuot sa burak tanganing aram nindo an tamang pag-alaga digdi, ta lain sa kapital, higos saka passion an puhunan.”