Mga sanga  kan CCMM, nagtiripon

“Pamibi: Susi kan Paglaom sa Pag-asenso” an tema kan Branch Assembly sa gabos na sanga kan Consuelo “Chito” Madrigal Microfinance o CCMM.  An surunudan na tiripon nagpuon kan Nobyembre 20 asin matapos sa Disyembre 11.

An aktibidad binubuksan sa paagi nin sarong Banal na Santa Misa kasunod an halipot na programa kun sain tinutukar an tema.  Sa saiyang paliwanag, tinawan duon ni Fr. Wilmer Tria, Chief Executive Officer, an mga sangkap sa pagpamibi na iyo an ACTS o an Adoration, Contrition, Thanksgiving and Supplication.  Segun saiya, dapat igwa kan apat na sangkap kun mamimibi. 

Nagpagirumdom man si Fr. Tria kan halaga kan pagpamibi sa arualdaw na pagkabuhay urog na tanganing dai mawaran nin paglaom. Dagdag pa nya, na an tawong may paglaom, may kakayahan na mag-asenso nin huli ta an saiyang paglaom an minatulod saiya na maghingua.

An enot na Branch Assembly ginibo kan Nabua Branch sa Holy Cross Parish Church sa banwaan kan Nabua kan Nobyembre 20.

An Santa Misa pinanginutan ni Fr. Joseph Abion. An Nabua Branch naglilingkod sa banwaan kan Nabua, Balatan asin Bato.

“Takmaon an oportunidad, dai na pagpalagpason,” parte kan nagin homiliya ni Fr. Eric Bobis sa Misa sa St. Bernard Abbot Parish Church, sa ika-duwang Branch Assembly na ginibo kan Ocampo Branch. Ini pigbalihan kan mga myembro hali sa Ocampo asin magkapirang barangay kan Syudad nin Iriga.

An ikatulong Branch Assembly ginibo kan Iriga Branch sa St. Anthony of Padua Parish Church kan Nobyembre 26. An Santa Misa pinanginutan man ni Fr. Mario Arnulfo Gaite, an kura paroko.

An Iriga Branch naglilingkod sa Syudad nin Iriga asin sa Baao asin Buhi. 

Kan Nobyembre 28, ginibo an ika-apat na Branch Assembly kan Libmanan Branch sa St. James the Greater Parish Church, an katedral kan Dyosesis nin Libmanan. An Santa Misa pigpanginutan ni Fr. Frederick Bailey, an kura paroko.

An Libmanan Branch sakop an mga banwaan kan Libmanan, Cabusao, Sipocot, Pamplona asin Pasacao.

An Caramoan Branch nagtiripon kan Nobyembre 29 sa St. Michael the Archangel Parish Church sa   Caramoan. Pigbalihan ini kan mga myembrong taga-Caramoan asin Garchitorena. An Misa pinanginotan ni Fr. Jaime Danilo Viola, an kura paroko, asin kaiba man si Fr. Ronald Asug, parochial vicar.

“Minsan an mga nangyayari sato na dai ta gusto iyo an paagi ni Lord ngani na mamatean nyato an Saiyang kapangyarihan saka an Saiyang pagkamuot. Minsan makulog, minsan makatakot, minsan grabe an aagihan mo pero sa tahaw kaini masabi ka,

Maray sana!” Ini parte kan pagheras ni Fr. Viola sa saiyang homiliya.

Sa lambang Misa, yaon si Fr. Tria bilang concelebrant.

An mga tiripon kan ibang sanga gigibuhon sa Disyembre 3, 5, 7, 10 asin 11. An Goa Branch, sa St. John the Baptist Parish Church an tiripon sa sa Disyembre 3. An Pili Branch, sa St. Raphael the Archangel Parish Church sa Disyembre 5.

An Polangui Branch, an pinakabagong sanga kan CCMM, matiripon sa Disyembre 7 sa  Sts. Peter and Paul Parish Church sa Polangui, Albay. An Calabanga Branch, sa Our Lady of La Porteria Parish Church sa Disyembre 10. An Naga Branches (Central, East, West) matiripon sa Metropolitan Cathedral sa Disyembre 11.  Si Arsobispo Rex Andrew C. Alarcon, DD an mamamayo sa Santa Misa. Imbitado man an mga padi kan Arkidyosesis kan Caceres asin Dyosesis kan Libmanan 

Aramon an mga detalye sa sunod na isyu kan Bunabon.

More stories