Capacity Building Program, nagpapadagos

Ika-2ng semana na kan ginigibong Capacity Building Program para sa mga homepartners kan Housing Program. Ini ginibo kan nakaaging ika-13 kan bulan nin Abril sa Multi-purpose Hall, Consuelo “Chito” Heights, Pacol, Naga City.

An aktibidad na “Business Development and Skills Enhancement Seminar,” ginibo tanganing an mga nagpartisipar mas urog na  nasabutan an kamugtakan kan saindang presenteng negosyo asin maaraman an mga kakaibang mga angat asin opportunidad sa pagnenegosyo. An mga  nagbali, iyo an mga homepartners na igwa na nin presenteng negosyo.

Si Juan Raul Relloso an resource speaker sa aktibidad. Si Relloso saro sa mga propesor kan Ateneo de Naga  University College of Business and Acountancy sa irarom kan Allied Business Courses Department.

Nagtao man Si Relloso nin patanid sa mga negosyanteng homepartners, “Kamo nagneneregosyo ta gusto nindo maghipno para makatabang bako man lang saindo, kundi sa pamilya nindo.   Nobleng maray na rason iyan kaya dai kamo masupog kun anong klase iyan basta an importante, tama an sinusunod nindo.”

Dagdag pa ni Relloso na maski na padikit-dikit an nakukuang ganansya sa saindang mga negosyo dakula pa man giraray an naitatabang kaini sa uroaldaw na pangastos na magigin kabawasan na sa isipon kan pamilya, “An sari-sari store padikit-dikit nakakatao nin pambalon sa aki, sa makuapo, kaya dapat padangaton tang maray, ngunyan maray man ining Madrigal ta nagtatao sinda nin mga training.”

Si Maribel Tang, saro sa mga homepartners an nagpapatotoo kan importansya nin paglilista o record keeping para maaraman an  gastos asin ganansya kan negosyo. “Haloy na kami nagnenegosyo, si agom ko matibayon siya magsurat. Tubod ako na dapat igwang record,” dagdag pa ni Tang.

More stories