Bunabon, nagtaong hamis sa negosyong sorbetes

Taon 2023, kan magpuon an negosyo kan 5ng magkaklase na sinda: Precious Mercy Pellas, Reina Angelica San Andres, Nicole Belodo, sindang tulo mga iskolar kan CCMF-Bikol. Ka-grupo man ninda si Ara Faith Lovendino na iskolar kan Tulong Dunong program sa irarom kan Commission on Higher Education asin si Darlene Sheene Cariño, saro sa mga Student Assistant sa Chemistry Laboratory kan Ateneo de Naga University.

Puon Enero 2023 hasta Marso 2023 kan sinda magpresentar kan saindang mga produkto sa paagi kan pag-aadal o business research na saro sa saindang requirements sa kursong Bachelor of Science in Entrepreneurship specialized track on Tourism.

Haros 15ng mga posibleng produkto para i-negosyo an inadalan kan grupo. Alagad gabos ini dai nagpasar sa saindang klase. Dai ninda pighuhuna na yaon sana palan sa harong an hinahanap na kasimbagan sa saindang problema. Segun ki Pellas, dikit na kaaraman sa pagluto asin pagbasa nin Bunabon an nagin susi tanganing madiskubre ninda an negosyong sorbetes, na ngunyan dakula na an ganansya. “Actually, nagpuon talaga an ideyang ice cream sa Bunabon. Nasa harong lang ako kaito. Mayo na kaming naiisip na produkto ta sunod-sunod na pig-reject si mga ipig-present mi. Nagbubuklat-buklat ako sa Bunabon tapos may nahiling akong paagi kan paggibong ice cream. Tapos duman na nagpuon an samong negosyo.”

“Mag-start sa passion and skills. Ta kun dai mo gusto an sarong bagay, baka sa simpleng problema lang baka habuan mo na baka maghanap ka na naman ibang negosyo,” dagdag pa ni Pellas.

 Segun man ki Belodo, may istorya sa likod kan saindang brand name na Haliya’s Ice Cream Production, “Si Haliya kaya, Bikolana goddess of the moon. Parte an Haliya sa 15ng negosyo na na-reject samo. Saka lima din kaya kami sa grupo tapos gabos pa kami mga babae.”

Setyembre 2023 kan iluwas ninda an saindang produkto sa laog kan Gainza Trade Fair. Segun ki San Andres, antes kan Disyembre 2023, nag-abot na sa Kwarenta Mil an nagin benta ninda. Nabawi na ninda an Duwang Ribong Piso na puhunan sa mga sangkap. Nakabakal na sindang sadiring freezer siring kagamitan arog kan mixer asin iba pa, tabang na mas maparikas an saindang produksyon, “Nagkita na kami nin haros Disisais na ribong piso kun dai ibabali an freezer.”

Sa ngunyan, nagpapadagos pa an saindang negosyo. Sinda mga 4th year students na. Pagkagradwar, plano kan grupo na ipadagos an saindang napunan na negosyo asin para matabangan man an mga lokal na paratanom sa paagi kan pagtukdo nin mga dagdag pang produkto na pwede nindang pagkakitaan arog na sana kan paggibo nin sorbetes.

An istorya kan grupo nagpapagirumdom na gurano man kapait an pinag-aagihan sa buhay, sa paagi nin higos asin diskarte, makukua an dalan sa mga problemang hinahampang. 

More stories