“Basahon an Bibliya: Sarong Kapitulo Kada Aldaw”

Kan Mayo 17, katakod kan Bible Reading Program kan Arkidyosesis kan Caceres sa irarom kan Commission on Biblical Apostolate o Caceres COMBIBLIA, ipiglunsar man an “Basahon an Bibliya: Sarong Kapitulo Kada Aldaw” sa mga empleyado sa paagi kan Formation Program kan Foundation.

An naunambitan na programa kan Arkidyosesis nagsasadol kan lambang saro na magtaong panahon uroaldaw na magpamibi asin magbasa kan Bibliya. Tinawan nin mga polyeto o booklet an mga empleyado na iyo an mataong giya sa pagbasa kan Bibliya uroaldaw.

Saro sa mga natawan, iyo si Jonald Salinas, empleyado kan Microfinance Program.

“Dakul akong naaaraman puon kan ako nagbasa kan Bibliya, arog kan pasyon palan na binabasa ko kada Semana Santa yaon sa Bibliya,” sabi ni Salinas.

Ipigheras man ni Salinas na bago an programa, yaon sana sa display an saindang Bibliya sa harong. Huli ta dai man sya tatao kun pano basahon.

Kan matawan nin booklet, nagpuon na si Salinas na magbasa kan Bibliya.

Ngunyan, kaiba na an saiyang agom asin duwang aki. Kada alas sais o alas syete nin banggi, nagbabasa an pamilya ni Salinas nin sarong kapitulo kada aldaw na pinunan kan Mayo 17. Hasta natapos na kan pamilya an inot na apat na libro na yaon sa giya kan Hulyo 25.

“Huli ta tatao naman magbasa an duwa kong aki, sinda pinapabasa ko man kan mga parte na pasil sanang basahon. Nauugma ako ta nagdadangog sinda, nangalas ngani sinda ta si Moses palan daa inabot lampas sa sanggatos an edad. Sa paagi kan pagpamibi tinatapos an pagbasa,” dagdag pa ni Salinas.

An programang ini nakatao sa pamilya ni Salinas nin paglaom, asin pagpagirumdom na sa gabos na nangyayari sa katawohan, yaon pirmi an Mahal na Dyos.

Sa ngunyan, dawa tapos na an booklet, padagos an pamilya ni Salinas sa pagbabasa kan Bibliya asin yaon na sinda ngunyan sa libro nin Leviticus.

More stories