Masiram asin masustansya,” arog kayan gustong mabisto ni Ma. Salve Balanza an saiyang banana chips, an enot na produkto kan MRM’s Food Enterprise, an saiyang sadit na negosyo. Si Salve 15ng taon na myembro kan Microfinance program.

Sa presyong tres syento singkwenta pesos, naimukna ni Salve an saiyang negosyo. Ngunyan 5ng bulan na sindang naggigibo nin banana chips. Katabang nya sa negosyo an saiyang bilog na pamilya, “Ako po an naubak nin batag, si agom po an naggigiris, si bunso man po an seller ko asin tagabakal lana asin asukar, si duwa ko pong aki tagapatos asin tagalaag nin label.”

Segun ki Salve, maugma sya na nahihiling an saiyang bilog na pamilya na tarabang sa pagtulod kan saindang negosyo. Pahayag pa nya, mas lalong nagsisiram an saindang banana chips nin huli ta lain sa hamis kan honey, pano pa ini nin pagkamuot, “Gusto mi po na mamati kan nagbabakal kun gurano kasiram an produkto kan sarong bilog na pamilya na nagtatarabangan, sadit man o dakula an negosyo.” “Masiram, barato asin masustansya po an samuyang banana chips ta honey po an gamit mi bako pong asukar,” pahayag pa ni Salve. Segun saiya mawot kan saiyang bilog na pamilya na magustuhan dawa kan may helang siring kan igwa nin dyabetes an saindang produkto.

Dugang pa nya, aroaldaw nag-aabot 8ng kilo nin batag an nagigibo asin naipapabakal ninda. Ngunyan, bako na sanang banana chips lang an produkto kan pamilya ni Salve. Segun saiya, igwa naman sinda nin popcorn asin mani. Ini napangyari sa tabang kan dagdag kapital hali sa Microfinance.

Labi man pasasalamat ni Salve sa Madrigal Foundation ta nakatapos na sa pagklase an saiyang duwang aki, “Grabe po an tabang sako kan Madrigal, si matua ko po graduate nin Electronics, si panduwa ko po, Electrical Engineering, si bunso Electrical Engineering man po. Hasta ngunyan po nag-utang giraray ako pandagdag kapital,” pahayag nya.

Sa mga mawot na magin reseller kan mga produkto kan MRM’s Food Enterprise, pwedeng magkontak sa 09207375182. An Microfinance program naglalaom na makatabang sa lambang pamilya na matawan dagdag kapital tanganing makamukna nin sadiring negosyo na mahawas sainda sa kadipisilan.