Iriga Branch nagtiripon kaiba an SKK

An Annual Reorientation kan Microfinance nagpuon kan Oktubre 28 asin natapos kan Nobyembre 27. An reorientation ginibo sa 12ng sanga kan programa sa aktibidad na ini katuwang an CLIMBS, an microinsurance provider kan CCMM NGO.

Sa Iriga Branch, lain sa reorientation, nagkaigwa nin sabay na pagpamibi o prayer meeting kaiba an SKK o Saradit na Kristyanong Komunidad kan St. Anthony of Padua Parish. Ini ginibo sa katuyuhan na maipamidbid an Microfinance Program sa mga SKK asin tanganing an mga microfinance members, magin parte man kan SKK kan parokya.

Segun ki Norma Marmol hali sa San Isidro Center kan Iriga Branch dakulang tabang an ginibong reorientation, “para samo importanteng maray ini ta nakakatabang ining maray samo na malinawan. Kaya medyo nagparahapot ako.”

Si Rosela Dimaiwat, an Center Chief kan St. John the Baptist Center kan Iriga Branch presente man sa ginibong aktibidad. Segun ki Dimaiwat bilang sarong Center Chief, importante an mga siring na aktibidad. “Well-informed kami lalong-lalong na ta ako an nagkakapot sa center kan San Juan, pag may arog baga kayan problema an sarong myembro, pirmi kitang alertado. So maray na nare-refresh itong mga mga dating nang nagin knowledge ta napapakinabangan.”

An ginibong tiripon nagin dalan man para maipamidbid sa SKK kan parokya an serbisyo kan Microfinance Program. Siring man, an nagin prayer meeting, saro sa paagi tanganing alukon an mga myembro kan Microfinance na magin aktibo sa parokya.

Si Amelia Panga, SKK Coordinator kan parokya, an nagin tulay na magkaigwang siring na tiripon. Si Fr. Wilmer S. Tria, an Chief Executive Officer kan CCMF-Bikol, iyo man an kura paroko kan St. Anthony of Padua Parish sa Syudad nin Iriga.

Susog ki Liza Marie Tating, Program Manager kan Microfinance, may mga parokyanong nagpahayag nin interes sa Microfinance. Nin huli kani, an Iriga Branch mabisitasa saindang barangay para makatao nin detalye kun papano sinda makabali sa programa.Bukas man an opisina kan Iriga Branch sa mga intersado magbali. Pwede sindang magkontak sa 0998 886 7127.

An CCMF-Bikol padagos na nagsasadol sa mga myembro na magbali sa mga programang nagpapatalubo nin espiritwal na buhay. Kun kaya linalauman na sa paagi kan tiripon, mas dakul na myembro kan Microfiance an makisumaro sa SKK asin sa prayer meeting.

More stories