Kan Setyembre 7, ginibo an orientation kan mga iskolar sa Central Bicol State University (CBSUA), Pili Campus katakod kan pagpuon nin bagong academic year 2024 hanggan 2025. Igwang 20ng iskolar an Foundation sa CBSUA – Pili.

Presente sa aktibidad sinda Flordeliz Cabrera an Chief of Administration na iyo an nagtao nin opening remarks asin si Jason Bermejo, an Farm Supervisor.

Segun ki Bermejo, puon Setyembre, may mga pagbabago sa apprenticeship o pahinunudan na ginigibo sa Madrigal Organic Farm sa Daculang Tubig, San Fernando, Camarines Sur.

Katuyuhan kan mga pagbabagong ini na mas ipabisto sa mga iskolar an organic asin integrated farming system na pwede nindang magamit sa produksyon, hanapbuhay, asin magin sa sainda mismong pagbuhay. Siring man na sinda makanuod kan post-harvest asin pag-market kan mga na aning produkto hali sa farm pasiring sa mga konsumidor. Ini gigibuhon sa paagi nin farm tour, workshop, lecture, discussion asin sa practicum.

Sa mensahe ni Cabrera, tinawan nyang duon na sa paagi kan apprenticeship, mas padangaton man lugod kan mga iskolar an saindang kurso asin ipadagos an legasiya kan mga paraoma, “Hopefully an Apprenticeship Program, mabago, asin mas ma-appreciate nindo an saindong course and i-pursue nindo as a profession an agriculture. ”