Microfinance, nasa Albay na

Pormal na binukasan kan Agosto 30 an opisina kan bagong sanga kan Consuelo “Chito” Madrigal Microfinance sa probinsya nin Albay. An opisina makukua sa San Juan St. Centro Oriental, Polangui, Albay.

An pagbendisyon pinanginutan ni Fr. Jose Victor Lobrigo, an Parish Priest kan St. Peter and Paul Parish, “Dakul na maitatabang kan Madrigal sa pagpauswag kan lokal na ekonomiya sa paagi kan mga nanay,” parte kan nagin mensahe ni Fr. Lobrigo.

Tinungkusan man ni Fr. Wilmer Joseph S. Tria, Chief Exeutive Officer, an mga programa kan Foundation. “Igwa kita nin multiple approach na tabang mi tanganing makahawas an kadaklan sa kasakitan. So, mayo ng rason para magtios huli ta tinatao ta po edukasyon, skills development pati an Microfinance.”

Ginirumdom man ni Fr. Tria an nagin tabang ni Fr. Lobrigo kan an Foundation nagpupuon pa sana. Segun saiya, dakul naitukdo si Fr. Lobrigo dapit sa pagpapadalagan kan Microfinance.

Sa mensahe ni Liza Marie Tating, Microfinance Program Manager sa mga myembro, sinabi nyang haloy nang pangiturugan kan programa na magkaigwang sanga sa Albay. “Pangiturugan mi po talaga ini kan nakaaging taon, talaga pong pighinguha mi po ngunyan na 2024 po na makalaog [sa Albay]. Salamat po sa pag-ako samuya po.”

Si Fr. Tria asin Hon. Alan S. Benisano, Barangay Kagawad kan Bgy. Centro Oriental, an nanginot sa Ribbon Cutting. “So mga kliyente po, sana po mas magdakul pa asin magin mauswag sa paagi kan Microfinance na ini,” parte kan nagin mensahe ni Hon. Benisano.

Nagpahayag man nin kaugmahan si Gigi Babiera, Center Chief kan Kinale Center. “Magaan sa paghulog, though groupings sya pero an sistema kan paghulog individual talaga. Sana po dakul pang mga branches na mabuksan para dakul pang matabangan na mga arog sakuya na nangangaipo.”

Presente sa tiripon an mga center officers asin suppliers kan opisina. Nakisumaro man an magkapirang empleyado kan Main Office sa Syudad nin Naga. Dai nagin ulang an uran sa simple asin makahulugan na okasyon. Linalauman na mabuksan an panduwang opisina sa Albay sa lalong madaling panahon.

More stories