Mga plano hasta sa 2026, hinaman

Pinag-urulayan an plano kan gabos na opisina kan Foundation  kan Hulyo 12 asin 13 sa Donsol, Sorsogon. Kabali an 22 na mga managers asin supervisors na hali sa maniriba-ibang programa kan Foundation arog kan Microfinance, Housing, Coko Cafe, Administrative Office asin Accounting.

Sa saiyang mensahe, tinawan duon ni Fr. Wilmer Joseph S. Tria, Chief Executive Officer, na an lambang saro tiniwalaan nin abilidad na dapat iheras. Kun kaya an pagplano dai dapat na sa pansadiri sana, “Kita tinawan nin ability to work. May kakayahan kita asin an nagtiwala kayan sa satuya an Mahal na Dyos. An kakayahan magplano, yaon man lang yan Saiya pero itiniwala Nya sa satuya.”

“We are all created in the image of God. Ngunyan, igwang itinitiwala sa satuya na  dapat mapakinabangan. Kaipuhan magin productive bako para satuyang sadiri kundi para sa kahadean kan Dyos,” dagdag pa ni Fr. Tria.

“Nauugma ako sa iribahan asin sa rarom kan napag-urolayan. Ini patunay na gabos interesado na magheras kan saindang mga magagayon na ideya asin mga solusyon ngani na mas mapamaray pa an kompanya,” parte kan nagin pahayag ni Danica Arpon, an Training and Formation Coordinator.

Sa 2026, matatapos an 5-year plan asin liwat na magibo nin planong pang-limang taon.

More stories