Microfinance Naga Branch, may bagong opisina

Pormal na binukasan kan Hunyo 14 an bagong opisina kan Naga Central, Naga West, Naga East – an sanga kan Consuelo “Chito” Madrigal Microfinance sa Syudad nin Naga.  An opisina makukua sa Rex Centro nin Kaaraman building sa Bagumbayan Sur.

An pagbendisyon pinanginutan ni Fr. Roberto Exequiel N. Rivera, SJ, Presidente kan Ateneo de Naga University (ADNU) asin Vice Chair kan CCMF-Bikol.  “Sa amin po sa ADNU, isang karangalan na kasama ang Ateneo sa misyon na ito. It’s really a privilege that Madrigal Foundation’s headquarters in Bikol is in Ateneo. Isa itong inspirasyon sa mga estudyante,” pahayag ni Fr. Rivera. 

Si Hon. Josephine Camba, Barangay Captain kan Brgy. Bagumbayan Sur asin si Fr. Wilmer Joseph S. Tria, CEO kan CCMF-Bikol, an nanginot sa Ribbon Cutting.  Presente man si Claudine Lou Beriña, Branch Head kan BDO Naga- San Francisco Branch asin si Gladys Samosa, dating iskolar kan Foundation na ngunyan nagtutukdo na sa ADNU Junior High School.

Sa saiyang mensahe, sinabi ni Brgy. Captain Camba na “Kaidto po nadadangog ko na po ini [Madrigal], ulay ko po itong urutangan lang, bako po palan. Kaya po ako nauugma ta talagang dakul po palan kamong natatabangan.”

Nagpahayag man nin kaugmahan si Rosemarie Almazar, myembro kan Microfinance Program, nin huli ta an opisina mas madali nang hanapon.

“Dati po kaito nagpuon ako 26 sana an habayan ngunyan dakula na. Dati, an mga aki ko, Elementary saka High School pa lang. Ngunyan, anom na po an nakatapos kong College. Salamat po sa CCMF. Hanggan sa kaya ko pa po, padagos man giraray akong member kan Madrigal,” dagdag pa ni Almazar.

Nag-istorya man si Samosa kan saiyang pagtrabaho sa Microfinance, katakod kan pagigin iskolar, “Sa sako pong pag-duty sa branch, nasaksihan ko po an mga istorya nin pag-asa, pagsusumikap asin sa pagnenegosyo kan ibang mga tao. Nawa’y magin dalan an Microfinance na ini tanganing mas dakul pang istorya nin tagumpay an mabuo.”

Segun ki Beriña bukas pirmi an saindang opisina para sa mga mawot na magbisita sa saindang branch sa Brgy. San Francisco.

“Salamat sa pagtabang lalo na sa mga nangangaipuhan. I hope dakul pang offices an mag-open para dakol pa kamong matabangan,” dagdag pa ni Beriña.

Imbitado sa okasyon an magkapirang myembro kan Microfinance hali sa Naga asin kataraid na munisipyo. Yaon man an mga empleyado kan Foundation.

More stories