Sa kamawotan na makatabang sa Arkidyosesis kan Caceres asin Dyosesis kan Libmanan na mapapusog an mga Saradit na Kristyanong Komunidad, nagmukna an CCMF-Bikol nin mga prayer groups kada center kan Microfinance program kan 2016. An kada grupo, inaasahan na magkaigwa nin prayer meeting kada semana. Alagad, kan nagkapandemya, napundo an mga prayer meeting kan kadaklan na centers. Ngunyan na tinutugutan na an mga tiripon, binalik na ini kan ibang Microfinance centers.

Saro sa mga centers na igwa na giraray nin prayer meeting iyo an Mabalodbalod center sa Ocampo na pinamamayuhan ni Merlina Pellas, Center Chief kan center. Sampulong taon nang myembro kan Microfinance si Merlina. “Mamundo ta dai na kami nakakabalangibog kan Tataramon kan Dyos bilang sarong center dahil sa pandemya,” pahayag ni Merlina.

Puon kan Hulyo, nagbalik na an prayer meeting ninda Merlina. Segun saiya, sa paagi kaini, mas nagrararom an pagkasabot nya asin kan saiyang pag-iriba sa pangapudan na magin parasunod ni Jesus. Dugang pa ni Merlina, bilang Barangay Pastoral Council President, dakulang tabang saiya an prayer meeting, “Bilang leader po, dakulang tabang ini lalo pa ta nagbibilog kami nin Saradit na Kristyanong Komunidad (SKK).”

“An pamilya ko po gabos tao nin simbahan. An agom ko Lay Minister, an aki ko po Usher, asin ako po Parish Pastoral Officer. Kaya dakulang tabang ini tanganing dai mapatod an relasyon mi sa Dyos,” dagdag pa nya.

Segun pa ki Merlina, ngunyan na paabot na an kapyestahan ni Ina, Nuestra Señora de Peñafrancia, mas pinapakusog kan prayer meeting an saindang debosyon, “Magayon na marhay an prayer meeting. Mas lalong nakakainganyar na magpartisipar sa selebrasyon ni Ina ta nare-refresh an pagkasabot mi sa tamang pagdebosyon kada prayer meeting.”

Inaalok man ni Merlina an ibang mga centers na buhayon an prayer meeting ta sa paaging ini, nagigin dayupot an mga myembro sa kada saro, asin ini dakulang tabang para sa magian na iribanan sa center.

An mga centers na buot magbilog nin prayer groups o magpatabang na magkaigwa nin prayer meetings, pwede mag-kontak sa 09774027341. Handa an CCMF-Bikol na magtaong giya sa mga centers. Titiripunon man an mga prayer leaders ngunyan na Septyembre para mas maaraman kan CCMF-Bikol kun papano makakatabang an Foundation sa pagpapusog kan prayer groups.