An pangapudan kan Kagurangan an nagtulod ki Jillian Regnim asin Shirley Pesebre, mga dating iskolar kan Foundation, na maglaog sa Jesuit Volunteers Philippines Foundation Inc. o JVP, sarong non-government organization na nagpapadara nin mga volunteer teachers, formators, community organizers asin iba pa sa mga nangangaipong mga banwaan.

Nagtapos si Jillian asin Shirley nin AB Religious and Values Education sa Ateneo de Naga University kan 2019. Pagkagradwar sa kolehiyo, tulos na naglaog si Jillian sa JVP asin sya nadestino sa Malaybalay City, Bukidnon bilang elementary teacher asin assistant dorm manager. An saiyang pag-volunteer nagtapos kan 2020. Mantang si Shirley naglaog kan Hulyo 2021 asin nadestino man sa parehong banwaan kun sain sya nagin volunteer campus minister, guidance advocate asin paratukdo. Segun ki Shirley, nagin dipisil saiya na mag-volunteer tulos. “Dai ako naka-volunteer tulos ta ako an solong naka-graduate samuya kaya ako po an nagtindog na breadwinner kan pamilya. Kaya ngunyan, happy ako nagin parte na ako kan JVP.”

Maugma man si Jillian ta dawa sa ibang paagi, napangyari an kamawotan nya na ibalik an tabang sa banwaan, “Plano ko talaga magmadre pero sa journey ko, pina-realize sako kan Dyos na iyo, gagamiton nya ako para magserbi sa tao pero bako sa simbahan, kundi sa banwaan.”

Nagtao man nin mensahe si Shirley sa mga bagong gradwar sa kolehiyo, “Aramon muna nindo an purpose nindo bàgo kamo maglakdang sa panibagong kabtang kan saindong buhay.”

“Si mga graduate ngunyan, try nindo mag-join sa mga NGOs. Dakul ka ini sa bilog na nasyon. Sa Bikol, yaon an Madrigal Foundation na dakula an maitatabang saindo asin sa banwaan. Kun nariribong kamo sa dalan na dudumanan, dai kamo masupog magrani sa Dyos,” mensahe man ni Jillian sa mga nagpupuon na maghanap nin trabaho.

Mapadagos si Shirley nin saro pang taon sa JVP kun sain sa Masbate na an saiyang bàgong assignment mantang maklase na si Jillian nin Master in Religious Education bilang sarong iskolar sa Mother of Life Center . Lugod, magin panalmingan an istorya ninda Shirley asin Jillian tanganing mas magdakul pa an mga hobenes na magdusay kan saindang kakayahan sa paglingkod banwaan.