Ugma man si Bernard na sa paagi kan MIFTP, nakakatabang sya sa banwaan, “tabang an Programa sa mga dai nakatapos alagad igwang aram sa Agrikultura ta natawan sindang oportunidad na maihiras an kaaraman asin magkatrabaho.” Dugang pa nya, sa pagtanom nin mga organikong gulay, sarong paagi na ini nin paglingkod sa banwaan.

Bilang program staff, sya an nagtataong giya sa mga presenteng iskolar. “Kan inot, kabado ako ta dati kairiba ko lang sinda sa apprenticeship, ngunyan saro na ako sa nagmamangno sainda. Dakula an adjustment. Kaya naisip ko dapat magin professional ta dapat magin dalan ako tanganing mas padangaton ninda an Agrikultura, ” dagdag pa nya.

“Sana dakul pang hobenes an makahiling kan gayon kan Agrikultura ta dakul kitang daga, kaipuhan tang gamiton yan huli ta dakul digding oportunidad. Sa paagi man kani, makakatabang kita sa iba. Madali magkita, tiyaga sana,” pag-agyat ni Bernard sa mga kapwa hobenes.

Kada taon nag-aako an Foundation nin 10ng bagong iskolar na maklase nin kursong Agrikultura sa Central Bicol State University of Agriculture-Pili, asin 10 na maklase nin Entrepreneurship asin Religous and Values Education sa Ateneo de Naga University.