“Kun talagang padangat mo an agom mo asin mga aki mo dapat mag-insurance ka, huli ta an hinihiling mo digdi si panghaluyan”. Ini an agyat ni Luzeil L. Laure, Housing Program Development Officer, CCMF-Bikol, sa mga nagduduwa-duwang mag-enrol sa insurance na saro sa mga obligasyon kan mga homepartners kan CHITO Community.

Arog kan pamilya Deviña na dai pa sana nahahaloy kan magtalikod sa kinaban an saindang ama na si Mario Deviña. Segun ki Mardith Deviña, matua sa apat na magturugang, nagin mas magian saindang pamilya na akuon an sitwasyon sa tabang kan insurance. “Dakulang kagianan po samuya an insurance ta mayo na kaming iisipon na mga bayadan dawa mayo na si Papa,” sabi ni Mardith.

Limang taon ng nakaistar an pamilya Deviña sa kinua nindang Vicente Unit. Dating security guard an ama nindang si Mario mantang haloy nang mayong bareta an magturugang sa saindang ina. Alagad, dai ini nagin ulang tanganing mag-igot sinda sa buhay. Ngunyan, an pagigin street vendor ni Marney Deviña, pang-apat sa magturugang, asin pag-extra ni Mardith sa Primus Hotel bilang sarong waitress an saindang pinagkukuanan nin pang-aroaldaw na panggastos.

Tinawan duon man ni Mar Frea Deviña, pantulong aki ni Mario, an karahayan kan pagkua nin harong sa Foundation, “Magayon po na mag-apply sa Madrigal Housing Program huli ta magayon an lokasyon asin marikas an pagproseso kan insurance claim.” “Maugmahon po kaming magturugang na igwa pa kaming nakuang tabang pinansyal na suway pa sa binayad sa harong mi. Salamat po CCMF-Bikol,” dagdag pa ni Mar Frea. Dai nya hunaon na igwa pa sindang naresibeng kantidad katakod kan insurance. An cash asssitance na nakua kan magturugang, tabang pinansyal kan insurance sa mga nagadanan susog sa insurance policy.