Si Marietta Rodrigo kan Brgy. Triangulo, syudad nin Naga, sampulong taon nang myembro kan Microfinance Program. An saiyang negosyong kinalasan na saiyang binuksan kan 2002, padagos na binabalik- balikan kan mga parakakan hanggan ngunyan. Ginirumdom ni Marietta kun pano nagpuon an saiyang negosyo. Makangalas isipon na an kinalasan na haros duwang dekada na nyang pinapadalagan, saiyang pinunan kan mayo pa syang halawig na kaaraman sa pagluluto. “Dati sana man po akong housewife. Si agom ko po sarong electrician. Kan nagadan sya kan 2001, nag-isip ako nin paagi tanganing mabuhay kami kan aki ko. Kan primiro po, dai man ngani ako tataong maray magluto. Pero nahiling ko na an pagkakan, mabentang negosyo ta ini sarong primirong pangangaipo. Nagpatukdo ako sa tugang ko na magluto nin loglog asin iba pa,” istorya ni Marietta.

Kan 2011, nagbali sa Microfinance Program si Marietta para makautang nin dagdag kapital sa saiyang nagdadakulang negosyo. Sa paagi kaini, sya naka-empleyo nin mga makakatabang sa aroaldaw na pagpapadalagan kan saiyang negosyo. Hali sa ganansya kan kinalasan, napatapos nya an saiyang aki sa kolehiyo. Saro man si Marietta kan mga nakakua nin mga gamit sa pagluto sa irarom kan Livelihood Seeding program kan Department of Trade and Industry sa Camarines Sur. Dakulang tabang sa saiyang negosyo an mga kagamitan na ini.

Sa edad na 61, kasabay kan pagigin katekista, mawot nya na ipadagos an negosyo hanggan sa kaya pa kan saiyang lawas. Segun saiya, “May trabaho na po an aki ko, alagad habo ko na magparaasa sa saiya. Para sa mga arog ko na may edad na, dai kita mawaran pag-asa.”

Mensahe ni Marietta, “An hanapbuhay para sa gabos. Mayo man yan sa edad. Hanggan sa kaya pa, pwede kitang mag-negosyo.”

Nagtutubod an CCMF-Bikol na kadakul Bikolano an mga kakayahan mag-negosyo alagad kulang an oportunidad nin huli sa kakulangan nin kapital. An Microfinance Programa yaon sa 27ng banwaan asin 2ng syudad kan Camarines Sur na handang magin katuwang para magkaiwang negosyo an mas dakul na Bikolano.