Sa kamawotan na makapuon nin sadit na negosyo, nagkua nin stall sa Naga City Public Market asin nagbukas nin water refilling station si Leilani Sarto, myembro kan Microfinance Program kan CCMF-Bikol nin 7ng taon. Sya man sarong homepartner kan Consuelo “Chito” Heights puon kan 2019.

“Nagpapasalamat ako sa Madrigal ta dakulang tabang an Microfinance Program sako asin sa sakong pamilya. Kaya si mga mawot na magkaigwang kapital, yaon an Madrigal na mawot makatabang sa sato,” sabi ni Leilani. Dagdag pa nya, nagin dakulang tabang an Foundation huli ta sa napunan nyang sadit na negosyo sa saudan, nagkaigwa sya nin water refilling station sa atubangan kan saiyang harong sa Consuelo “Chito” Heights.

Ngunyan, mawalong taon na an stall ni Leilani. Manlain-lain na dry goods an saiyang tinda arog kan twalya, bag, asin iba pa. Nagin pasil para saiya na padalaganon an saiyang sadit na negosyo. “Kan mayo pa nin pandemya, magayon an samong berentahan sa market ta igwa pong panahon na makusog an samong negosyo arog pag Disyembre,” istorya nya. Alagad kan nagkapandemya, saro an negosyo ni Leilani sa mga nadanyaran kani. “Grabe an epekto samong sadit na mga negosyante ta grabe an baba kan berentahan.” Kaya para ki Leilani, dakulang kagianan para saiya na igwa syang ibang negosyo.

“Dai ako nagpupundo maghanap paagi asin dagdag na pagkakakitaan. Kapag maluya an water refilling station, naghahatod ako nin tubig sa mga saradit na tindahan tanganing padagos an sakuyang negosyo.” Dagdag pa ni Leilani, sya man nagpapabakal sa paagi kan mga Facebook groups asin messenger. Dawa masakit an pagnegosyo ngunyan, para ki Leilani, kaipuhan maghanap nin mga paagi tanganing maipadagos an hanapbuhay. An Microfinance Program mawot na makatabang sa mga gustong magpuon nin sadit na negosyo lalo na nahahampang kita sa manlain lain na krisis. Para sa dagdag impormasyon dapit sa pautang sa Public Market, magkontak sa 09088207518. Pwede man bisitahon an Microfinance Office sa Madrigal Center, Ateneo de Naga University, Naga City.